Ministru Interior, Francisco da Costa Guterres informa, iha semana oin nia sei aprova diploma ministerial hodi bele estabelese komisaun rekrutamentu polísia foun nian.
Hafoin halo promosaun diviza tranzitoriu no por-antiguidade ba membru PNTL sira, daudauk ne’e posizaun ajente mamuk, nune'e mak sei halo rekrutamentu ba ajente foun.
"Ita halo rekrutamentu foun mai iha ajentes hamutuk 400, sira ne’e mak sei mai priense fali pozisaun ajentes. Ita espera sei hahú rekrutamentu, agora promosaun diviza hotu, husik lai sira kontente hotu lai, depois ita hahú loke iha fulan oin," dehan nia bá Jornalista sira, iha edifisiu Komando UEP, Bairo-Pite, Sesta (16/05).
Iha semana oin, nia hatutan, bele publika despaixu ministérial ida ba nomeisaun juri no komisaun supervizaun no sekretariadu ne’ebé tau-matan ba rekrutamentu membru polisia foun sira.
"Né'ebe ita hahú ona prosesu ida ne’e iha fulan Juñu nia laran. Nune'e iha fulan Juñu né'e komesa loke bá publiku ona, kona-bá hato'o informasaun bá publiku ona katak ita hahu ona ho kriteria temi hotu ona, para depois se mak hakarak ba tenki haree ba kriteria né'e."
Ba aplikante sira, nia hatete, tenke priense kriteria sira hanesan kestaun komportamentu, idade, altura no saude.
"Prosesu rekrutamentu sei transparante ba iha publiku, tanba iha komisaun supervizaun no monotorizasaun kompostu husi malae JNR sira, sosiedade sivil, parlamentu nasionál par tau-matan, par rekrutamentu ne’e transparante."
Molok ne’e, Komandante Jerál PNTL Komisariu Jerál Polisia Henrique da Costa informa, Komando Polisia Nasionál Timor-Leste (PNTL) submete ona rekezitu sira atu aplika iha prosesu rekrutamentu ba membru polisia foun, ba iha Ministeriu Interior.
"Agora kona-ba ninia regras (rekezitus) sira ne’e hotu, ita prepara no hato'o ona ba sua exelensia Ministru Interior hosi parte juridiku nian, sira sei haree hela. Bainhira sira aprova mak foin bele inisia prosesu ba iha rekrutamentu ne’e," informa nia ba jornalista sira, Kinta (15/05).
