JSMP sujere MJ kria sistema online ba atendimentu Pasaporte Featured

By Agustino Gama Novembru 26, 2023 1341
Sidadaun balun forma hela iha areadór Diresaun Jeral Servisu Rejistu Notariadu, atu bele trata pasaporte, Kuarta (22/11). FOTO: INDEPENDENTE/Agustino Gama. Sidadaun balun forma hela iha areadór Diresaun Jeral Servisu Rejistu Notariadu, atu bele trata pasaporte, Kuarta (22/11). FOTO: INDEPENDENTE/Agustino Gama.

DILI: Judicial Sistem Monitoring Programa husu ba Ministériu Justisa atu kria atendimentu pasaporte liu husi sistema online, nune’e bele evita sidadaun sira hobur-malu iha edifisiu Diresaun Jeral Servisu Notariadu.

Diretora Ezekutiva JSMP, Ana Paula Marcal preokupa ho akontesimentu sidadaun sira sa’e moru DJSN hodi ba trata pasaporte.

Tuir nia, MJ, liu-liu DJSN presiza hadia sira-nia sistema atendimentu nune’e bele evita akontesimentu hanesan iha futuru.

“Ida ne’e sai trabalho de casa (TPC) ba sira atu nune'e haree ona nesesidade ne'ebé presiza, tanba iha Timor agora ema barak presiza pasaporte," dehan nia ba jornalista sira iha Timor Plaza, Kinta (23/11).

Tuir nia, iha era agora, loloos tenke adapta ona ba dijitalizasaun, tanba sistema manual ne’e nia tempu liu ona.

"Hanesan foin lalais ita haree inan-ferik sira no alin-feto sira sa’e moru, ita haree ida ne’e triste. Ho nune'e husu nafatin ba governante sira hadia sistema atendimentu ida ne’e, tanba tuur iha ne'ebá atu servi povu," katak nia.

Iha parte seluk, Ministru Justisa (MJ), Amandio de Sa Benevidas hatete, tanba atendimentu pasaporte ho sistema manual nune’e ema tenke hobur-malu.

"Atendimentu manual mak nune'e ona ita, atu halo nusa, ita hein katak, ema hotu-hotu pasiensia par ita hein tutuir malu, konsekuensia par depois ita bele rezolve problema sira ne'e, tanba ita labele halo nusa, tanba ita-nia sistema manual hela," dehan nia liu husi komunikadu ne’ebé Jornal INDEPENDENTE asesu husi gabinete Ministru Justisa, Kinta (23/11).

Nia hatutan, hanesan Ministru fó ona orientasaun ba DJSRN atu tenta halo atendimentu ba ema hotu, mais ema hotu tenke pasensia, labele hadau-malu no hobur-malu.

"Avizu tiha ona sidadaun sira ne'ebé husi munisipiu tenke fila ba idaidak nia fatin hodi trata pasaporte iha Munisipiu sira no sira ne'ebé mak urijente mak ba iha Notariadu nasional, maibé ema hotu-hotu hakarak ba iha ne'ebá pasensia ema hotu tenke antrian."

"Solusaun mak tenke pasensia, tenke atrian nafatin, par depois funsionariu sira no tekniku sira ne'ebé mak halo atendimentu to'o hotu. Tanba ita-nia sistema ne'e di'ak hela tanba ema mak barak duni, ema hotu-hotu hakarak mai hotu dala ida labele to, hanesan ita ba haan iha meza hotu-hotu hakarak hadau-malu ne'e ita atu tama ba meza mós la di’ak," dehan ministru ne’e.

Rate this item
(0 votes)

Independente Digital TV

Tuir ami iha Twitter

Kalendariu Notisia

« April 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30