Tuir Profesor Agostinho Pinto hatete, la lojika bainhira Ministeriu Edukasaun fó tiha kontratu ba sira maibé la extende sira nia kontratu no haruka atu kompete fali iha vaga tuir mai.

Nia dehan, bazeia ba deklarasaun Ministeriu Edukasaun nian ne’ebé fó sai katak, professor kontratadu hirak ne’e latuir rekejitu lei funsaun publika, maibé tanba sá funsaun públika autoriza halo  pagamentu ba sira nia salariu iha fulan janeiru to’o fulan novembru tinan ne’e.

“Karik laiha ezizensia nafatin ami pronto atu ba halo manifestasaun boot iha Ministeriu Edukasaun,” dehan nia, iha Jardin 5 de Maio, segunda (27/11).

Entretantu, Portavós Konsellu Nasional Professor Timor-Leste, Elizario Barreto hatete professores kontratados iha tinan 2023 prienxe rekijitus iha estatutu kareira donsente. Tanba iha Governu anterior valida ona sira nia dokumentus hotu, hodi konklui katak professores hirak ne'e iha meritu tuir regra jeral estatutu funsaun publika nian.

Maibe, iha IX Governu Konstituisional liu husi Ministeriu Edukasaun hatete katak, professor hirak ne’e la tuir rekejitus no la tama iha ingressu espesial, tanba ingresu espesial ne’e haree deit ba professor sira ne’ebé hetan kontratu iha tinan 2013 to’o 2022.

Nia dehan, iha direitu Lei N°,31/2023 de 31 de maio, la iha artigu ruma ko’alia espesifikamente kona ba ingressu espesial hare deit ba professor kontratadu husu tinan 2013 to tinan 2022.

Enkuantu, Profesor kontratadu tinan 2023, konsidera deklarasaun husi Ministeriu Edukasaun iha IX Governu hanesan diskriminativu boot ida.

"Ami konsidera deklarasun ida ne'e iha tendensia politika vingativa husi Governu ida ba governu seluk nia prestasaun servisu,”tenika portavoz.

Nune’e, tuir dadus professor kontratadu tinan 2023, ne’ebé sira nia kontratu sei remata iha fulan Dezembru tinan ne’e hamutuk na’in 1.499.