Premiu Konsellu Imprensa 2019 ne’e dedika ba media ka orgaun komunikasaun sosial ho titlu "Orgaun ka Meu-Komunikasaun ne'ebe trata di'ak liu (bem-Estar) traballador no jornalista", katak ladun komete infrasaun etika, garante independensia editorial, promove liberdade imprensa no liberdade espresaun, no halo tratamentu di’ak liu ba nia jornalista sira.

“Ami deside fó ba diariu Independente mellor premiu Konselho Imprensa 2019, tanba sira kontra kodigu etika iha, maibé kiik liu kompara ho media sira seluk boot liu, no tramentu bens estar ba funsionariu, jornalista sira, laos di’ak liu, maibé diariu Independente respeitu prinsipius jerais kona-ba trabaladór sira-nia direitu,” dehan Diretór Ezekutivu Konsellu Imprensa, Rigoberto Monteiro via telefone, Domingu (18/10).

Ba atribuisaun premiu ne’e, Rigoberto hatete, KI halo monitorizasaun ba media boot sira hanesan Timor Post, STL, Independente, Bussines Timor, Dili Post, no GMN, inklui televizaun sira ne’ebé mak hala’o serbisu jornalizmu nian.

“Media online ami seidauk halo, tanba estrutura redasaun ba media online balun seidauk priense, tanba ne’e iha tinan ida ne’e ami fó liu prioridade ba media sira ne’ebé eziste kleur ona no area kobertura ida ne’ebé mak luan iha teritoriu timor laran tomak,” katak nia.

Atribuisaun premiu ida ne’e realiza durante komemorasaun trajedia Balibo ne’ebé koñesidu ho Balibo Five, ba tinan 45 iha Balibo, Munisipiu Bobonaro, Sesta (16/10).

Prezidente KI, Virgílio da Silva Guterres informa, atribuisaun premiu husi KI ba media hahú kedan iha 2017 ba kategoria sira hanesan Premiu Greg Shackleton, Adelino Gomes, Borja da Costa, Bernadino Guterres no Maria Goreti.

Ba tinan ida ne’e, Virgilio dehan, KI la konsege hetan vensedór ba premiu Borja da Costa, Bernadino, no Greg Shackleton.

“Ami hakarak  hetan vensedór iha Balibo Five maibé la konsege tanba desizaun juri nian labele interven,” dehan nia.

Kona-ba ekipa juri, nia dehan, ekipa juri iha na’in 7 ne’ebé mai Asosiasaun Jornalista no akademiku sira.

Objetivu husi atribuisaun premiu ne’e mak atu valoriza esforsu no obra jornalista, no insentiva no motiva dii’ak liu tan vontade hakerek.

Diretór Jornal Independente, José Sarito Amaral agradese ba premiu ne’ebé KI atribui ba jornal Independente.

Diretór ne’e dehan, komponente iha Jornal Independente sei esforsu maka’as liu tan hodi garante kualidade públikasaun no garante mós direitu ba jornalista sira nu’udar trabaladór.

Entretantu, ba premiu Orgaun no Meiu Komunikasaun Sosial relasaun ho Jornalista di’ak liu mak Jornal Independente, manan-nain ba premiu Maria Goreti ba kategoria Jornalizmu Pás no Direitu Umanu mak Francisco José de Almeida husi media online Neon Metin, no premiu Adelino Gomes ba kategoria maiór traballu jornalístiku ho lian Portugues mak Isaura Lemos de Deus husi Timor Post.

Manan-nain sira simu troféu, sertifikadu no osan ho montante $1.500. Premiu ne’e entrega husi Ministru Asuntu Parlamentár no Komunikasaun Sosiál, Francisco Jerónimo, Prezidente KI Virgilio da Silva Guterres, no Diretor Ezekutivu Sentru Nasional Chega, Hugo Maria Fernandes.