Fofoun, jornal INDEPENDENTE mosu ho hanoin atu oferese obra jornalistiku ne’ebé diferente ho media imprime sira seluk ne’ebé eziste ona. Ho esperensia ne’ebé fundadór no ekipa jornal ne’e iha husi servisu ne’ebé hala’o antes, konsege halo mudansa balun.
Sekretariu Estadu Komunikasaun Sosial (SEKomS), Mericio Juvinal Akara, fó parabéns ba Jornal INDEPENDETE ne’ebé eziste ona durante tinan 11.
Tuir nia, durante ne’e jornal INDEPENDENTE sai media ida ne’ebé kritiku no balansu.
“Parabens ba jornal INDEPENDENTE media ne’ebé mak kritiku, halo balansu, ita-nia jornalista sira iha ne’eba mós iha koñesimentu klean tanba sira balun ha’u koñese sira, balun senior,” dehan nia iha Parlamentu Nasionál, Tersa (29/03).
Akara dehan, durante ne’e jornalista sir servisu tuir duni kodigu etika.
“Ha’u lee beibeik produtu INDEPENDENTE nian, ne’ebé mantein ita-boot sira-nia servisu profisional ho di’ak, kontinua servisu kontribui ba ita-nia demokrasia iha ita-nia rai.”
“Lalikan tauk kualker presaun politika ka ekonomia ne’ebé de’it, mantein nafatin ita-boot sira-nia independente, tuir de’it kodigu etika, kontribui ba informasaun loos no kredivel ba ita-nia sidadaun,” dehan Sekretariu Estadu ne’e.
Dudu Media Seluk Servisu ho Kualidade
Diretór Asosiasaun HAK, Sisto dos Santos konsidera, prezensa jornal INDEPENDENTE no ho ninia ezistensia durante ne’e obriga media sira seluk atu servisu ho kualidade no independente duni.
"Ami apresia tebes tanba mós iha tinan kotuk iha Balibo, 16 fulan Outubru, premiu ida ne'ebé ba iha jornál INDEPENDENTE mós husi jornalista INDEPENDENTE nian, indikadór hatudu katak jornalista INDEPENDENTE nian hatudu ona integridade, kualidade, haklaken informasaun ho loloos ba públiku," dehan Sisto iha nia kna'ar fatin Faról, foin lalais.
Maske nune’e, tuir Sisto, klaru katak iha dezafiu ne’ebé jornal INDEPENDENTE hasoru durante ne’e, maibé la’os kestaun ida atu la orgullu ho obra sira.
“Tenke orgullu no valoriza, biar kiik maibé investe ona informasaun sira ba públiku atu nune'e públiku la konsume de'it ba parte ida ne'ebé halo públiku mós dala-ruma nakonu ho dúvida.”
“Ho prejensa jornál INDEPENDENTE dudu media sira seluk atu mós servisu ho kualidade ho independente duni, sa tan agora naran INDEPENDENTE ne'e ba hotu-hotu tenke orgullu ba ida ne'e,” dehan nia.
Asosiasaun HAK, nia dehan, dala-barak hetan intervista husi jornalista jornal INDEPENDENTE, liu-liu kona-ba informasaun ne’ebé iha relasaun ho asuntu direitus umanus.
“Ami fiar katak ita-nia leitor sira bele mós foti fonte ida ne'e sai sira-nia referensia, ita mantein ita-nia imparsialidade, ita mantein ita-nia independente, servisu ho korajen biar laloran, dala-ruma to'o tempu ida ita sei hasoru laloran ida boot liu maibé ne'e lá'os kestaun ida atu hakiduk," nia enkoraza.
Daudauk ne’e, nia dehan, jornal INDEPENDENTE hamriik ona iha dalan klaran, tan ne’e kontinua ba oin hodi oferese informasaun ho faktus ne’ebé loloos ba públiku.
Sisto konsidera durante ne’e jornal INDEPENDENTE servisu ho kualidade no integridade duni.
"Ami enkoraja ba jornalista no mós jornál INDEPENDENTE kontinua mantein imparsialidade ida ne'e, iha situasaun ida ne'ebé agora ita hasoru hela polarizasaun polítika ida ne'ebé todan tebes ne'e dezafiu boot ba jornalista sira, dala-ruma atu públika sai ka atu halo edit mós dala-ruma ne'e dilematiku tebes ba editor sira, liu-liu ba jornalista sira, maibé enkoraja atu kontinua, see de'it mak sente ofendidu ita hamutuk atu kontra sira tanba durante ne’e ita mantein no ita hamriik metin, buat ida loos no informasaun aktual ne'e ita hotu nia preokupasaun, lia loos ida ne'e mak ita-nia kolaborasaun hamutuk," dehan nia.
Iha fatin ketak, Diretór Ezekutivu Asia Justice And Rights (AJAR), José Luís de Oliveira hato'o parabéns ba ezistensia Jornál INDEPENDENT ba tinan 11.
"Ha'u hato'o parabéns ba Jornál INDEPENDENTE, hein katak kontinua forte atu divulga realidade iha sosiadade no defende lia loos ho justisa di'ak liu," dehan nia.
