Prezidente CVTL, Madalena Hanjam hateten, ba komunidade ne'ebé sempre hela iha área rsiku, tenke iha konsiensia atu sai husi fatin  hirak ne'e, labele halo uma, tanba bainhira udan tun mota tun, rai monu sei lori uma,  ema, kuandu ida-ne'e mak kontinua akontese  sei la rezolve problema.

"Governu tenke hatene kondisaun ida ne'e, atu oinsá fo regra ne'ebé rigor atu oinsá fatin risku ne'e ema labele halo uma hodi hela ba, tanba maske sira bá buka moris mós ikus sei estraga rasik sira nia vida," nia hateten hafoin enkontru ho Double Dosaster Case Study Report Launch, iha CVTL, Kinta (01/04).

CVTL mós sei ko'alia ho seguransa PNTL atu fo netik regra restritu ba komunidade tomak, nune'e bainhira udan, tenke halo kontrolu makaas ba joven sira labele tebe bola, halimar iha estrada laran, halai ba halai mai, konserteza sei dada mós labarik kiik, entaun risku ne'e bainhira mota boot tun, bele akontese dezastre hanesan baibain akonteste, ikus joven labarik sira sempre lakon vida.

Ida ne'e hanesan responsabilidade boot, maibé CVTL hanesan ausiliáriu Governu nian, tenta nafatin atu fó apoiu atu bele asegura ema sira ne'e ho di'ak.

Durante ne'e CVTL la servisu mesak, maibé  hetan apoia másimu husi CV parseiru sira, liu-liu Austrália, Indonézia, Singapura ne'ebé durante dezastre mosu, sempre akompaña husi parseiru hirak ne'e.

Sira apoia lona, ekipamentu hodi vitima sira halo uma, inklui fós liu 40.000 sakas, daudaun CVTL asegura nafatin, bainhira komunidade hetan dezastre bele fó apoiu nafatin.

Iha fatin hanesan, Diretor Nasionál Jestaun Risku Dezastre, Agostinho Belo hateten, Kruz Vermella Timor-Leste hala'o enkontru ho parseiru Kruz Vermella Austrália, atu bele halo estudu avaliasaun hodi responde ba situasaun dezastre ne'ebé akontese iha tinan 2021 mai to’o agora.

Dadauk ne'e mós Governu ho CVTL identifika hela lakunas sira ne'ebé durante ne'e karik iha, maibé lakuna ne'ebé identifika la'ós buat boot, maibé difikuldade rekursu lojistika, fasilidade sentru evakuasaun.