Jornal INDEPENDENTE nu’udar media imprime ida iha Timor-Leste ne’ebé harii iha 04 Abril 2011. Iha tinan ida ne’e, INDEPENDENTE marka ona ninia ezistensia ba tinan 11.

Ho mudansa teknolojia ne’ebé hahú lekar ba aspeitu barak iha ema nia moris, nu’udar media konvensional ida, jornal INDEPENDENTE mós hasoru obstaklu no dezafiu lubuk.

Prezensa media online, liu-liu media sosial, fó ameasa real ba ezistensia media konvensional sira.

“Dala-barak informasaun balun ne’ebé jornalista foti, foin hakerek atu públika, utilizadór media sosial balun hakerek ona iha sira-nia estatutu no ema barak mak lee ona. Bainhira ita hatun ka públika bele dehan sin ka basi ona,” dehan Xefe Redasaun jornal INDEPENDENTE, Jorgino dos Santos, iha ambitu komemorasaun ezistensia jornal INDEPENDENTE ba tinan 11, iha edifisiu jornal INDEPENDENTE, Hudi Laran, Sabadu (02/04).

Ohin loron, tuir Jorgino, ho smart phone ema hotu-hotu bele fahe no asesu informasaun ho lais ne’ebé fó impaktu tebes ba servisu jornalista sira, liu-liu ba media konvensional.

Ba media online, nia dehan, bele dezenvolve lalais informasaun ne’ebé pasa iha media sosial, halo konfirmasaun ba fontes ne’ebé iha ligasaun no buka tan ho faktus balun, bele públika daudauk ona.

“Iha menutu balun de’it informasaun ne’e tuun ona iha online. Sira bele update tan informasaun refere iha oras balun tuir mai. Agora ba ita, media imprime, ita presiza tempu ne’ebé naruk liu, loron sorin, bele to’o loron ida foin ema bele lee,” dehan nia.

Ida ne’e, tuir nia, sai nu’udar dezafiu boot ba media konvensional sira.

Konsiente ba dezafiu ne’e, Jorgino hatete, jornal INDEPENDENTE kontinua reforsa ninia kualidade iha kestaun rekursu umanus hodi bele produs notisia ne’ebé iha kualidade mós.

“Ita eziste ona durante tinan 11, klaru, ita hasoru dezafiu boot ida, maibé fiar katak ho esforsu husi ita tomak iha jornal INDEPENDENTE ne’e ita sei bele hetan solusaun no hakat neineik dezafiu ne’e,” nia espera.

Iha oportunidade ne’e, Xefe Redasaun agradese mós ba staf hotu-hotu iha jornal INDEPENDENTE ne’ebé durante ne’e fó kontribuisaun maka’as hodi jornal ne’e bele eziste to’o tinan 11.

Iha  fatin hanesan, Diretór Jornál INDEPENDENTE, José Sarito Amaral afirma, atu adapta an ba era dijitalizasaun, iha tinan 2015 jornal INDEPENDENTE mós lansa ninia online www.independente.tl.

“Hakarak ka lakohi ita tama ona iha era dijitalizasaun, ita presiza mós adapta an. Maske nune’e, ita kontinua reforsa ita-nia an oinsa atu bele lori ita-nia jornal ne’e ba oin,” dehan nia.

Media online INDEPENDENTE, nia dehan, la’os atu hamate ezistensia jornal nian, maibé buka atu kompleta malu hodi kontinua oferese notisia ba públiku.

Iha oportunidade ne’e, Sarito agradese mós ba ekipa tomak ne’ebé konsege hala’o kobertura no públika informasaun kona-ba eleisaun prezidensial ronde dahuluk ho masimu tebes.

“Maske ita menus rekursu maibé ita konsege koloka ita-nia jornalista sira ba kandidatu Prezidente Repúblika sira no konsege halibur notisia ho balansu ida. Maske sei iha frakeza balun, maibé ita bele hadia,” dehan nia.