Tuir Sub Inspetor Jerál AIFAESA Deonisio Neto da Silva hatete, ho situasaun ida ne'e atu informa ba públiku katak AIFAESA ninia atividade ne'e rutina, lorloron AIFAESA halo tanba Públiku nia preokupasaun liliu liga ho presu, entaun konsege prosesa ona empreza lubuk ida ne'ebé halo espekulasaun.
Nia haktuir, informasaun agora espalla katak AIFAESA la halo kontrolu, mais atu dehan de'it katak Autoridade nia kontrolu ne'ebé halo bazeia ba lei ne’ebé vigora ona iha AIFAESA.
"Liga ho presu ne'ebé iha merkadu hahú husi Janeiru to'o mai Juñu intervensaun ne'ebé ita halo ne'e ita konsege prosesa ona Empreza 23 ba iha Ministeriu Públiku," dehan nia iha knaar fatin AIFAESA Matadoru, Segunda (10/07).
Nia afirma, prosesa tanba espekulasaun ba presu no embarkamentu ba produtu sira ne'e, kategoria krime, entaun na'in mak Ministeriu Públiku entaun AIFAESA tenke remete ba iha Ministeriu Públiku mak sei prosesa.
"Prosesu 23 ne'ebé iha provizoriamente ida mak submete ona ba iha tribunal para halo prosesu julgamentu, ne'ebé ita hein prosesu sira," nia dehan.
Enkuantu, Empreza sira seluk mós AIFAESA halo nafatin inspesaun rutina ba sira, bainhira identifika ona mak iha iregularidade ruma nafatin prosesa sira, se prosesu ne'e Administrativamente de'it mak sei hela de'it iha AIFAESA mais se krime mak sei prosesa ba iha Ministeriu Públiku.
Kazu 23 ne'e husi empreza 23 ne'ebé tenta halo espekulasaun ba produtu no asaun brankamentu ba produtu no prosesu ne'e kontinua desizaun final iha tribunal agora dadaun ida maka ba ona tribunal falta 22 maka iha prosesu nia laran.
"Ne'e liu-liu ba espekulasaun naton ita boot sira hatene Públiku kestiona kona-ba Nasaun Midar, Bebidas Asukarada, Mina ho produtu sira seluk ne'ebé presu sa'e fora husi lei haruka, ha'u hanoin tuir lei presu justu define marjen de lukru katak 10% ba to'o 15% ba iha Empreza sira atu hetan lukru," nia salienta.
Nia dehan, agora atu justifika ida ne'e Aifaesa lori fatura de kompra no fatura de venda hodi ida ne'e mak Aifaesa halo análiza ba sira nia fatura rua ne'e para haree katak atinje duni 10% no 15% ne'e kalae se liu husi ida ne'e kontra lei prosesa ona ho lei númeru 4 krime asaun embarkamentu espekulasaun.
"Katak nia kriminaliza ona no prosesu ne'e hanesan baibain remete ba iha Ministeriu Públiku, ne'ebé atu justifika ida ne'e ita labele haree presu aas maibé ita haree mós ida presu de sosa tanba ne'e mak ita presiza rekoilla evidensia sira ne'e hotu."
"Ita boot sira hatene, informasaun ne'ebé ami rekoilla husi empreza balu dehan katak balun presu fos sa'e kedas husi nia orijen balun dehan impaktu husi tasa mais atu justifika sira nia deklarasaun hirak ne'e ami presiza sira nia fatura no dokumentu sira komprova duni katak lo'os iha orijen ne'e sa'e no mós tasa ne'e sa'e duni, tanba ne'e mak ami presiza dokumentu komprova ida ne'e," tanik nia.
Entertantu, Empreza hirak husi ne'ebé no iha ne'ebé, hanoin labele espekula sai, maibé atu haklean de'it katak prosesu hotu iha ona parte Ministeriu Públiku atu bele halo nia servisu.
