"Kestaun laboratorium AIFAESA preokupa desde mandatu VIII Governu nian agora iha IX Governu mosu dadauk, ami mós prepara hela proposta grasa deus kuandu proposta ne'e IX Governu mai mak aprova sei lao ba oin," dehan Inspetor Jerál AIFAESA Ernesto Monteiro, iha knaar fatin AIFAESA Matadoru, Segunda (10/07).

Nia afirma, agora dadaun ne'e iha ona kondisaun ka fatin atu instala laboratorium refere, bainhira governu mai mak apoiu duni hola ekipamentus tau, nune'e bele halo teste la presiza lori ba li'ur ona.

"Ita nia tekniku AIFAESA mós kuaze besik 20, ne'e formasaun ba iha laboratorium nian so de'it aparellu ba iha ne’ebá hodi halo servisu mak la iha. Ida seluk fila-fali liga mós ba ida ne'e ha'u atu hato'o katak laboratorium ne'ebé ke antes ne'e iha maibé ninia kondisaun ohin loron la di'ak, entaun ita mós presiza hadia, ha'u hanoin ida ne'e mak ha'u bele ko'alia," tenik nia.

Iha fatin hanesan, Sub-Inspetor Jerál AIFAESA Deonisio Neto da Silva hatete, ligadu ho laboratorium, inisiu kedas AIFAESA sempre kestiona kona-ba laboratorium la'os foin VIII Governu mak Aifaesa kestiona. Maibé depois AIFAESA instala ezijensia ne'ebé boot mak laboratorium.

"Tanba servisu ne'ebé ita halo ne'e maibé halai liu ba kualidade produtu, tanba atu asegura produtu nia kualidade ba iha konsumidor sira nia konsumu, agora ita presiza laboratorium, tanba ne'e mak ita husu ba ita nia nai ulun sira haree liu-liu ba iha Parlamentu Nasionál para aprova ita nia proposta sira ne'ebé ita sempre submete," nia dehan.

Durante ne'e proposta sira AIFAESA sempre hato'o hela de'it, maibé proposta hirak ne'e la pasa hela de'it iha Parlamentu Nasionál liu-liu atu estabelese laboratorium ida.

"Mais ita fi'ar katak ho IX Governu ida agora bele fó prioridade ba iha Aifaesa oinsá atu instala laboratorium para bele apoiu Aifaesa ba futuru oinsá atu kontrola produtu alimentar ne'ebé di'ak liu no rigor. Proposta ida ita submete ba atu instala laboratorium alimentar mais ate adata la hetan aprovasaun iha plenaria," tenik nia.