Hafoin besik tinan, Diresaun Jeral Servisu Rejistu Notariadu (DJSRN) ‘taka’ portaun ba sidadaun sira atu trata pasaporte tanba kaderneta pasaporte hotu, iha loron 22 Novembru, DJRN hahú loke portaun hafoin kaderneta pasaporte rihun 16 to’o iha Timor-Leste.

Maske molok ne’e anunsia ona katak kada loron sei atende de’it sidadaun na’in 140 hodi trata pasaporte, maibé ema lubuk ida mak ba sena-malu iha edifisiu DJSRN. Balun hanesan ho Lucas, tuur ona iha portaun DJSRN bainhira rai sei nakukun.

"Ami mai desde tuku 1:00 madrugada, hahú ema nakonu ona, maibe atendimentu ne’e tarde loos, tanba tuku 09:00 ona mós seidauk halo atedimentu," dehan Lucas iha areador DJSRN.

Desde dader nakukun, nia dehan, ema hahú sa’e ba portaun no forma ona iha areador DJSRN.

“Desde tuku 4 madrugada ne'e aredor Notariadu nian nakonu ona,” dehan nia.

Maske hein ona desde dader nakukun, maibé Lucas ho sidadaun lubuk seluk la konsege hetan oportunidade atu trata pasaporte iha 22 Novembru. Lucas hetan sorte di’ak uitoan tanba simu númeru hodi bele trata pasaporte iha 23 Novembru, ohin.

Lucas dehan, nia mai trata pasaporte ne’e tanba daudauk ne’e nia tuir hela formasaun iha SEFOPE atu ba servisu iha Koreia Sul.

Sidadaun seluk, Jorge Barros maske la hetan oportunidade atu trata pasaporte iha loron dahuluk, maibé nia deklara kompriende ho situasaun ne’e tanba sidadaun barak mak mai trata.

"Ita simu konsekuensia ida ne'e tanba tuir informasaun ne'ebé mak sira pasa ona mai ita katak sira fahe ona pasaporte ba kada Munisípiu no ita hare iha Munisipiu Dili ho ema ne'ebe mak barak tebes-tebes, tanba ne'e ita tenke hasoru situasaun ida ne'e,” dehan nia.

Entretantu, maske númeru sidadaun ne’ebé hakarak trata pasaporte barak tebes, maibé DJSRN mantein ho desizaun atu atende ema na’in 140 kada loron.

Diretor Jeral Servisu Rejistu Notariadu, João Fernando Martins Borges hatete, nia parte hasai ona avizu katak kada loron sei atende de’it ema na’in 140.

"Ohin ha'u dehan tiha ona kuandu bee ida ita butuk liu mak nia nakfera hanesan ne’e duni, kuaze sira hein durante fulan ualu ita laiha pasaporte, ohin ita loke atendimentu ba publiku konserteza ema mai barak. Maibé ita tenta atu atende sira hotu tuir kapasidade ne'ebé iha, la'os ohin hotu kedas maibé fazeadamente," dehan nia.

Tuir nia, atendimentu ba publiku ne’e la'os fasil tanba ne’e maske sidadaun sira forma no hobur-malu, maibé atendimentu iha Notariadu mantein tuir kapasidade.

"Ita tenta nafatin atu ohin fahe númeru ba sira no sira ne'ebé hetan númeru ne’e ohin loron ema na’in 140 uluk, aban hanesan, 140, no tuir mai 140, no sira ne'ebé mak ohin iha ne'e ita atende fazeadamente tuir kapasidade," katak nia.

Ba oras atendimentu nian, Diretór ne’e dehan, servisu iha Notariadu hahú iha tuku 8:00 no atendimentu hahú iha tuku 8:30.

Nia esplika, DJSRN munisipiu Dili halo de’it atendimentu ba komunidade Munisipiu Dili nian no atende pedidu ofisial sira husi instituisaun relevante.

Enkuantu ba komunidade husi munisipiu seluk, nia dehan, tenke trata iha ninia munisipiu.

“Sira ne'ebe mak ohin konsege mai forma mak notariadu sei simu no haree sira-nia dokumentus hodi haruka fila ba ninia munisipiu.”

"Ha'u fo hatene ona ba sidadaun sira iha ne'e katak, atendimentu iha ida-idak nia Munispiu, tanba tuir esperansa ne'ebe iha Munisipiu ne'é atende pasaporte barak mak Munisipiu Bobonaru, Baucau no Dili, restu ne'é laiha ida," nia informa.