Diretór MSSI Munisipiu Dili, Luis da Costa hatete, hafoin MSSI Munisipiu Dili asesu informasaun husi Jornál INDEPENDENTE kona-ba Amilca, ninia ekipa tuun kedan hodi foti dadus hodi bele fó apoiu emerjesia ba Amilca ho nia maun-alin no avó feto.
"Agradese ba jornalista Jornal INDEPENDENTE. Ami mós direitamente halo asesmentu ho nia (Amilca), ita rona (nia istoria) triste tebtebes,” dehan nia ba jornalista Jornal INDEPENDENTE iha nia knaar fatin, Bemori, Kinta (07/09).
Nia hatutan, ekipa husi MSSI Dili oferese apoiu emerjensia hanesan foos, mina, koto no supermie ba Amilca ho nia familia.
Aleinde apoiu emerjensia ne’e, MSSI mós sei buka dalan oinsa atu fó apoiu finanseiru ruma ba Amica ho nia maun-alin na’in rua.
“Tanba haree ba kondisaun nia avó forsa laiha atu hetan osan,” dehan Luis.
Luis dehan, nia parte sei hato’o relatoriu ba Ministra Solidariedade Sosial no Inkluzaun hodi bele tau konsiderasaun.
"Tinan kotuk orsamentu iha par apoiu ema kbiit laek sira, maibé iha tinan ida ne'e tanba laiha baze legal, maibé ami iha ona dadus par lori ba membru governu par haree," dehan nia.
Iha oportunidade ne’e, Diretór MSSI Dili ne’e husu mós ba Ministériu Justisa, STAE no Igreja atu fasilita Amilca ho nia familia hodi trata dokumentus sira.
