“Inundasaun ne'ebé akontesimentu iha loron 21 fevereriru 2022, iha parte ponte Komoro, dadus provijoriu ne’ebé iha, uma kain 57 mak hetan estragus ho total ema hamutuk 230, husi númeru ne'e labarik ho tinan lima mai kraik hamutuk 52 mak infetadu ba inundasaun ne’e. No dadaun nee vitima sira evakua ona ba iha Dom Bosko Komoro,”dehan Administradór Postu Administrativu Dom Aleixo, Mario Barreto, ba Online INDEPENDENTE iha knar fatin, Fomentu I, tersa nee (22/02).

Nia hatutan, akontesementu inundasaun refere la rejulta ema kanek no mate, maibé iha uma rua (2) neebé laaproveita tanba mota lori hotu no mós sasan balun iha uma laran mós la aproveita.

Iha fatin hanesan, Xefe Aldeia Fomentu I, Luis Camões, hatete, iha nia area fomentu nee uma hitu (7 ) mak hetan afetadu tanba be'e tama iha uma laran, no sasan balun mós lakonsege hasai.

Xefe Aldeia nee kestiona, tuir lolos komunidade sira labele hela tan ona iha fatin refere, tanba haree ba akontesementu iha 4 abril 2021 nian, fó atensaun ona atu komunidade labele halo tan uma iha fatin nee.

“Tuir lolos komunidade sira matan mós ona bainhira  ita liga fali ba dia 04 abril, maibé komunidade sira nunka tauk no kontinua nafatin  hela iha  mota ninin,”haktuir Xefe Aldeia.

Nia hatutan, foin lalais governu  dehan ona katak komunidade sira ne'ebé hela iha fatin risku henesan iha mota ninin bele buka fatin ida ne'ebé dignu, atu nunee labele akontese tan maibé komunidade sira lakohi entaun inundasaun nee akontese fali hanesan tinan kotuk liu ba.

Entretantu, komunidade ne'ebé vitima ba inundasaun, Lusia da Silva, informa, sira la senti atu akontese inundasaun hanesan nee, tanba derepente deit mota tuun mai sobu sira nia uma no sasan balun la aproveita hanesan dokumentus oan sira nian no sasan uma laran balun.

“Inundasaun neebé akontese horiseik (21/02) hanesan mehi ida, ne'ebé ita la espera no bainhira buat ne'e akontese foin hakfodak sente fuan moras,” dehan vitima refere.

Tanba nee, vitima sira husu ba Governu atu apoiu sasan ruma no kria fatin ida neebé dignu ba sira.