Enkuantu, molok ne’e, Konsellu Ministru aprova ona projetu Dekretu-Lei ne’ebé aprezenta husi Ministru Finansas, Rui Augostu Gomes, ne’ebé ho objetivu atu kria no regula apoiu finanseiru temporáriu no estraordináriu sira ne’ebé sei fó ba empreza ka empregadór sira no ba traballadór individuál sira ne’ebé la servisu ba ema ka instituisaun seluk no ida ne’ebé rejista ona iha rejime konstributivu seguransa sosiál nian.
Diploma ne’e ho objetivu atu hamenus impaktu ekonómika pandemia nian, no mós hodi kontribui ba manutensaun postu traballu no sobrevivénsia empreza nian sira.
Tuir Prezidente INSS, Longuinhos Armando Leite, hatete, pagamentu ba empregador no traballador fakultativu sira ba fulan tolu tan, maibé sei presiza Diploma Ministerial ruma, nune’e atu mantein ho traballador antes ne’e ka sei fó tan oportunidade ba sira ne’ebé atu rejistu foun fila-fali.
"Tanba ne'e, ami sei hein orientasaun klaru tuir diploma ministerial ruma no ami hein hela, atu ita kontinua ho traballador no empreza sira ne'ebé rejistu ona hodi hetan apoiu ne'e, ka ita fó mós oportunidade ba ita nia empreza sira ho traballador sira ne'ebé foin dadauk laiha oportunidade mai rejistu no sira bele mai rejistu fila-fali,”dehan nia ba Online INDEPENDENTE, iha knar fatin INSS, Kaikoli, kuarta ne’e (12/01).
Tanba ne’e nia dehan, atu implementa programa ne’e, parte tekniku sei halo kordenasaun ho Ministeriu Koordenadór Asuntu Ekonomiku (MKAE), tanba MKAE mak sei responsavel maximu ba programa ne'e no parte Institutu Seguransa Sosiál hanesan implementador.
“Ami sei tur hamutuk hodi husu klaru didiak lai, hanesan ohin ne'e ha'u hateten, atu kontinua ho trabalhador ho empreza sira ne'ebe agora dadauk ita selu hela ne'e ka ita fó mós oportunidade ba empreza no traballador sira ne’ebé foin daduk laiha oportunidade mai rejistu,”nia subliña.
“Pagamentu ne’e sei halo ba fulan tolu nian, tuir dekretu ne’ebé aprova iha Konsellu Ministru, nune’e sei halo iha fulan-Janeiru to’o Marsu ka husi Fevereiro-Abril tinan ne’e,”esplika nia.
Entretantu, pagamentu ba empregador no traballador sira ne’e hahú ona iha tinan 2020, nune’e kontinua to’o mai agora.
Iha tinan 2021 INSS halo ona pagamentu ba traballador hamutuk 15.775, empregador 1.239, empregador ba eletrisidade 658, rend aba entidade empregador 256, dispensa kontributivu 463, dispensa kontributivu fakultativu 8.887 no fakultativu rasik 8.887. Ho nune’e, orsamentu neebé selu ona hamutuk $9.782.883.03.
Asistente Editor: Saturnina da Costa
