Enkuantu, servisu hamutuk entre enjeñeiru sira husi Estadus Unidus Amérika no Timor-Leste nian sei konstrui tan armazen foun ida no hadia mós lutu atu apoia F-FDTL no operasaun komersiál iha futuru.
“Servisu ne'ebé hahú ohin reprezenta pasu importante ida iha ami-nia kompromisu atu fó rezultadu ba reabilitasaun konjunta Aeroportu Baukau nian," hatete Enkaregadu Negósiu Embaixada EUA, Tom Daley, liu husi komunikadu neebé Online INDEPENDENTE asesu, kuarta nee.
Tanba nee, Estadus Unidus Amérika orgullu tebes halo parseria ho F-FDTL hodi reabilita aeroportu ne'e, atu nune'e bele hametin kapasidade Timor-Leste nian iha área seguransa marítima, dezenvolvimentu ekonómiku, asisténsia umanitária, no resposta ba dezastre.
Durante projetu ne'e, membru na'in 15 husi 554th Red Horse Squadron sei servisu hamutuk ho enjeñeiru F-FDTL sira atu harii armazén foun ho luan 477 metru kuadradu, ne'ebé sei utiliza atu hallot ekipamentu apoiu aéru, inklui ekipamentu apoiu ba bombeiru, kamioneta kombustível, forklifts no kareta sira seluk.
Ho nunee, ekipa konstrusaun konjunta ne'e sei hadi'a mós lutu ne’ebé hale'u área aeroportu nian hodi hametin seguransa ne’ebé seguru.
Tuir planu, projetu rua ne'e, sei remata iha fulan-Abríl tinan 2022, no aspetu sira husi servisu ne'e sei hala'o liu husi koordenasaun ho Forsa Navál Estadus Unidus nian Seabees.
Projetu ida ne’e halao hanesan preparasaun ba simu aviaun Cessna 206 ne’ebé oferese husi Estadus Unidus no sei to’o iha Timor-Leste iha tinan ne'e nia laran.
Ekipa 554th Red Horse Squadron mak enjeñaria sivíl ne'ebé movel tebes ba Forsa Aéreu Estadus Unidus nian ho ninia baze iha baze forsa Aéro EUA Andersen iha Guam.
Entretantu, molok nee, iha fulan-Juñu tinan 2021, Estadus Unidus Amérika kompromete ona atu hamutuk reabilita aeroportu Baukau ho Governu Timor-Leste. Liuhusi kriasaun Komponente Aéreu ida, projetu ne'e sei fó asisténsia ba F-FDTL no sei tulun Governu Timor-Leste atu hadi'a ninia koñesimentu iha área marítima, hodi hatán ba dezastre naturál sira no promove dezenvolvimentu ekonómiku.
Enkuantu, total orsamentu ba rehabilitasaun aeroportu nee hamutuk dolar amerikanu tokon U$10.6, neebé finansia husi Governu Timor-Leste liu husi Ministeriu Defeza no Estadus Unidus Amerika.
