Enkuantu, sasan sira nee mak hanesan, roupa obralan, sepatu no pasta. sira nee hotu laiha ida mak salva no ahi han mutuk hotu.

Tuir Koordenador Jestaun Merkadu Manleuana, Julio Barros Fernandes, hateten, kauza husi insediu nee, deskonfia mai husi sirkuit eletrisidade, hodi hamosu insendiu refere.

Nia hatutan, insediu neebé akontese nee, iha parte blok A, fatin neebé estadu prepara ba vendedor sira hamutuk na’in 35 nee no mós uma adisional ka salon ida.

"Ohin ne'e, obralan ho uma deit mak ahi han, hanesan sapatu, kalsa, faru, no seluk, laiha tan tipu seluk. Ba osan no buat seluk ha’u seidauk klarifika ho sira, tanba ohin ha’u haruka sira presta sira nia deklarasaun ba Polisia Eskuadra Dom Aleixo Ai-Mutin, ne'ebé vitima sira sei iha hela parte investigasaun, no ami sei hein banihira sira mai, ami sei husu ida-idak atu deklara sira nian atu nu'une bele foti nia dadus,"dehan nia ba Online INDEPENDENTE iha Merkadu Manleuana, segunda nee (14/02).

Nia haktuir, bainhira insediu nee akontese, vendedor sira seidauk mai loke sira sasan (obralan), tanba kalan sira ba toba iha ida-idak nia uma.

“Hafoin akontesementu nee estudante sira husi eskola Canosa nian mak hetan no hakilar mak ema hotu foin hakfodak, no iha oras ne'e kedan ema balun kontaktu kedan bombeirus, maibé bombeiros lakonsege salva sasan sira nee, tanba sira mai tarde no ikus mai uma hirak ne'e no sasan sira hela deit uut,”nia akresenta.

Iha Fatin hanesan, Vitima insendia Merkadu Manleuana, Leolinda Maria Soares, sente triste tebes tanba roupa ne’ebé sira faan ahi han mutuk hotu.

“Ha’u laiha hanoin ona atu koalia saida, tanba roupa sira ne'ebe ami faan nee, ami hola iha loja no osan sira ne'e nia funan seidauk fila, tanba sasan sira neebé faan ema ladun sosa,”dehan vitima refere.

Nia haktuir, nia rasik lahatene kauza husi akontesementu nee, tanba bombeirus rega hotu ona ahi neebé han mak vitima foin mai husi uma, haree nia sasan no fatin ahi han mutuk ona.

Entretantu, Leonito da Costa, nudar sasin, hateten, nia haree ahi suar sae no mós estudantes sira husi Canosa  hakilar no bolu nia, hafoin nia halai mai haree, ahi suar sae no uma no sasan sira ahi han mutuk ona.

“Ohin dader ha’u dasa hela rai mak estudantes sira iha Canosa nee mak hakilar dehan, maun ahi han obralan, entaun ha’u mós halai mai ahi suar sae ona no uma komesa mutuk,”dehan sasin.

Asistente Editor: Saturnina da Costa