Diretur AJAR, José Luís de Oliveira hateten, Deputadu sira labele ko’alia de'it, maibé tenke uza sira nia poder ba investigasaun hodi deskobre buat sira ne’e, labele husik asuntu ne’e sai hanesan polítiku de'it.

Triste bo’ot bainhira ita hare labarik sira, tanba loloos sira atu goja sira nia direitu ba estuda no halimar, la’os ba fali servisu.

“Deputadu sira tenke husu Komisaun Nasionál Direitu Labarik (KNDL), durante ne'e halo saida, labarik barak nia direitu violadu, maibé hanusa la halo intervensaun ruma,” informa José Luís de Oliveira ba jornál INDEPENDENTE iha nia kna'ar fatin Faról, foin lalais.

Nia hakutuir, tenke kestiona servisu KNDL, tanba labarik sira la goja sira nia direitu ba halimar no estuda.

Nia fo hanoin, uluk inan ida tanba de'it osan laiha atu pinor nia oan, tanba ki’ak, durante ne'e dezenvolvimentu la la'o, tanba dezenvolvimentu konserta de'it iha elit sira maka moris di'ak, halo estadu gasta osan ba hariku ema polítiku sira de'it.

Situasaun agora ne’e, povu la dezenvolve, tanba atu han loron ida dala ida mós susar, maibé bo’ot sira hanoin sa'e karreta luxu de’it, sira riku iha ema kiak nia leten.

"Governu tenke interven atu asegura katak labarik sira goja sira nia direitu ba estuda no halimar, ministériu relevante sira tenke interven atu haree inan-aman sira ne'ebé husik ka haruka nia oan sira ba halo traballu infantil ne'e tenke fó solusaun," tenik nia.

Nia esplika, solusaun ba kurtu prazu MSSI tenke fó ajuda sosiál ba inan-aman sira ne'ebé atu hetan hahan de’it mós susar.

Ajuda sira atu hetan servisu ne’ebé permanente, tanba governu uluk promete atu kria kampu traballu 60 mill ne’e iha ne'ebé. 

Entretantu Akadémiku husi UNDIL, Hugu Lourenco hateten, traballu infantil lá'os fenomena foun ida, maibé situasaun polítika ho impasse ne'ebé naruk maka kontribui ba traballu infantil hodi hamosu violasaun ba direitu labarik.

"Ita ratifika lei lubuk ida, liu-liu kona-ba direitu labarik no labarik iha kontestu kontemporáriu tuir valor universal, labarik iha direitu ba halimar no iha direitu ba edukasaun la'ós iha direitu atu ba servisu ida ne'e baze fundamental kona-ba labarik sira ne'ebé agora dadaun ita hare sai fali hanesan kontribuitór ba ekonómia familia nian," haktuir nia.

Nia esplika, ho situasaun hirak ne’e hatudu katak, povu Timor-Leste ne’e ki’ak tebes. Ne’e duni, halo labarik sira hahú ona iha responsabilidade ekonómia hodi sustenta nesesidade familia.

"Ha'u hanoin governu laiha kapasidade atu rezolve buat sira ne'e, tanba labarik barak tenke lakon sira nia futuru, sira lakon sira nia eskola, tanba tenke ba faan sasán atu sustenta familia.

Nasaun ninia responsabilidade maka kria bem estar povu nian, entaun governu maka iha responsabilidade as liu, tanba governu iha rekursu no kapasidade atu realiza no atinji objetivu sira ne'e.