Tuir Diretóra SSMD, Agostinha Segurado hatete, ho númeru ne’ebé sa’e makas iha tinan ida ne’e, ekipa vijilansia epedemolojia hatudu ona sira nia analiza diak hodi halo prevensaun, tanba tinan ida ne’e sa’e makas kompara ho tinan lima liu ba.

“Analiza husi parte vijilansia epidemolojia nian katak, hatudu ninia trend ne’e makaas tebes, nia sa’e makaas liu kompara ho tinan 5 liu ba, ezemplo hanesan, iha loron 1 fulan-janeiru tinan 2021 depois remata loron 31 janeiru kazu dengue iha na’in 30 no mate laiha, maibé mai fali iha tinan ida ne’e foin tama loron 5 deit, rejistu ona númeru aas,”dehan nia ba jornalista sira, hafoin remata enkontru ho autoridade lokal sira  iha edifisiu Postu Administrativu Vera Cruz, (06/01).

Nune’e, husu ba inan-aman sira bainhira oan sira hetan sintomas hanesan, isin manas, isin baruk ka laiha vontade atu han, tenki lori lalais ba iha Sentru Saúde sira ne’ebé besik hodi halo tratamentu.

Tanba ne’e, SSMD mós husu ba komunidade sira atu hamos ambiente ka hela fatin sira, nune’e bele hadok moras refere.

Entretantu, iha sorin seluk Prezidente Crus Vermelha Timor-Leste, Madalena Hanjam, hatete, intervensaun ba prevene susuk hodi labele hamosu kazu dengue ne’e hahú kedas molok udan monu rai, liu husi programa fumigasaun ba fatin sira ne’ebé konsidera risku iha Dili laran.

“Daudauk ne’e ita haree kazu sa’e maka’as ona iha Dili laran inklui rejista kazu mate, entaun ita lebele hein kazu ne’e grave mak foin halo prevensaun, ne’e duni partisipasaun Cruz Vermella nian ne’e ajuda tebes MS iha parte fumigasaun nian,” dehan nia.

Ho serbisu ne’ebé CVTL halo, nia husu ba familia sira atu loke odamatan ba ekipa voluntariu CVTL hodi bele halo sira-nia servisu.

Aleinde ne’e, nia mós husu ba komunidade sira atu hamoos sira-nia ambiente hodi prevene susuk tolun iha laran.

“Iha tempu ida ne’e, populasaun tenke unidus atu bele kombate surtu Dengue ida ne’e, liu husi hamoos ambiente, labele soe fo’er arbiru, trata oan sira tenke ho di’ak, bainhira moras tenke lori kedas ba fasilidade saúde,”hakotu nia.