Diretór Ezekutivu INFPM, Brígido Simão Dias de Deus informa, daudaun ne’e kompañia Sali-Magu foin hatama aimoruk, konsumaveis, no reajente hamutuk item 300 resin.
Iha 8 Marsu liu ba, nia dehan, parte kompaña hato’o ba INFPM katak sira prontu atu kumpre kontratu hodi hatama item 531.
“Sasan sira ne’ebé agora ami simu total 300 ital item, ne’e sura kedas desde Dezembru (2023) mai ne’e, husi total ida ne’ebé nia prontu ona atu hatama mai to’o fulan Jullu ne’e atu kompleta 531 item," dehan Brígido iha edifisiu INFPM, Kampung Alor, Tersa (07/05).
Diretór ne’e dehan, produtu mediku hirak ne’ebé Sali-Magu hatama ona bele responde ba de’it ba fulan Abril to’o Juñu tinan ne’e. Tan ne’e ba oin tenke loke prosesu ho regras normal atu bele responde ba nesesidade ospital no fasilidade saude sira.
Ba aimoruk item 200 resin ne’ebé Sali-Magu seidauk hatama, Brígido dehan, tuir prosesu bainhira kompaña ida asina kontratu ona mak foin hameno ba fabrika atu produs aimoruk. Tan ne’e presiza tempu to’o fulan tolu mak bele to’o iha Timor-Leste.
Ho ida ne’e, INFPM halo ona diskusaun intensivu ho Ministériu Finansas atu buka solusaun, tanba Sali-Magu nia kontratu termina ona iha 27 Marsu 2024.
Kona-ba pagamentu ba kompaña Sali-Magu, nia dehan, INFPM buka hela mekanismu tanba sasan sira simu ona no utiliza ona.
“Governu iha dever tenke selu ema-nia sasan sira tama mai ne’e. Governu buka mekanismu halo pagamentu ba produtu ne’ebé tama mai, restu labele, tanba kontratu mós remata ona.”
INFPM hein de’it despaisu husi Ministériu Finansas (MF) no Ministériu Saúde (MS) nune’e bele prepara hodi halo pagamentu ba Sali-Magu.
“Sei haree ba lista ne’ebé kompaña hatama iha loton 8 Marsu ne’e. Ho 531 item ne’e hatama hotu governu sei selu orsamentu $4.6 miloens. Se agora 300 item resin, nia foin mak tama ba iha orsamentu $1.4 miloens," dehan nia.
INFPM, nia dehan, sujere atu la extende kontratu kompaña Sali-Magu nian. Maibé tanba regras atu halo pagamentu tenke hamoris kontratu tan ne’e presiza atu extende par pagamentu bele lao.
“Ne’ebé INFPM hanoin de’it extende (kontratu) par halo prosesu pagamentu de’it mais atu hatama tan sasan foun ne'e sente sei todan, maibé depende ba Konsellu Ministru mak deside,” dehan Brigido.
Relasiona ho asuntu ne’e, Jornalista INDEPENDENTE koko halo konfirmasaun ho Diretór kompaña Sali-Magu, Sansão Gomes, maibé Diretór ne’e la disponivel hodi fó informasaun.
Molok ne’e, deputada husi Bankada Fretilin iha Parlamentu Nasional, Nurima Ribeiro Alkatiri informa, iha fiskalizasaun ne’ebé Bankada Fretilin halo ba INFPM iha 24 Abril, simu informasaun husi Diretór Ezekutivu INFPM katak tuir kontratu Kompaña Sali-Magu atu hatama produtu médiku item 946.
“Maibé to’o agora Sali-Magu foin hatama de’it 300 ital items, no informa ba INFPM katak sira só bele hatama to’o 500 item deit to’o Juñu 2024. Kontratu adjudikasaun refere mate ona, no osan ne’ebé tau iha orsamentu retifikativu fila ona ba kofre estadu, maibé Ministra sei extende Sali-Magu nia kontratu,” dehan Nurima.
