Komisariu Komisaun Funsaun Públika (KFP), Fausto Freitas da Silva informa, númeru Funsionariu Públiku (FP) ho idade avansadu ne'e hahú kedas husi tempu UNTAET to'o ohin loron.
"Funsionariu Públiku ne'ebé desde tama iha tempu UNTAET ne'ebé ke to'o mai agora besik 7 mill itál mak idade tama ona reformadu," dehan Fausto hafoin partisipa serimónia selebrasaun loron lian Portugés iha salaun INFORDEPE, Balide, Tersa (07/05).
Husi númeru ne'e, nia dehan, balun ho idade tinan 60, balun tinan 70 no balun tinan 80 ba leten ona.
Foin daudauk, nia hatete, KFP hatama ona autorizasaun lejislasaun bá Konsellu Ministru hafoin sei haruka ba Parlamentu Nasional hodi deskuti no aprova no lori ba Prezidente Repúblika atu promulga.
“Promulga tiha mak ita foin bele haree no Konsellu Ministru kala sei halo Dekretu Lei ida hodi bele konfirma kona-ba reforma ida ne'e see mak hakarak reforma maibé ne'e tenke obrigatoriu, ne'e la'os halimar, kuandu lei ne'e aprova no promulga ona," katak nia.
Iha fatin ketak, Diretór Nasionál Estensaun Formasaun Agrikola, Ministeriu Agrikultura ho Pekuaria, Peska no Floresta (MAPPF), Januario Marcal informa, sei identifika funsionariu sira ne'ebé tama ona idade reforma.
Nia dehan, estensionista sira ne'ebe rekruta iha tinan 2008-2009 no sira balun husi tempu Indonesia tama ona idade reforma.
"Ita hanoin katak atu troka funsionariu estensionista sira ne'ebé tama ona idade reforma, no bele truka fali balun ne'ebé mate ona no mós balun tama ona idade 58 atu besik 60," informa Januario iha nia knaar fatin Komoro, Tersa (07/05).
Molok ne’e, Governu konstitusional dasia liu husi reuniaun Konsellu Ministru aprova projetu proposta lejislativa kona-ba fiksasaun limite idade ba Funsionariu Públiku no Ajente Administrasaun.
Iha projetu proposta lei ne’ebé Konsellu Ministru aprova ne’e hatuur katak Funsionariu Públiku (FP) no Ajente Administrasaun sira ne’ebé tama ona idade tinan 60 atu rekere ba reforma obrigatoriu.
“Governu liu husi proposta lei ida ne'e atu husu Parlamentu Nasional nia autorizasaun hodi fixa limite idade ne'ebé fó kauzasaun ba serbisu relasiona ho Administraun Públiku sira,” informa Ministru Prezidénsia Konsellu Ministrus ein ezersísiu, Adérito Hugo da Costa, hafoin reuniaun KM, iha palasiu governu, Kuarta (24/04).
Hugo dehan, objetivu husi projetu proposta Lei ne’e atu estabelese mekanizmu nesesáriu sira ne’ebé fó dalan atu promove profisionál joven sira iha Administrasaun Públika nasionál, nune’e bele lori kompeténsia foun ba iha funsionalizmu públiku.
"Renovasaun ba iha kuadru Administraun Públiku ida ne'e nu'udar medida Esensial asegura meloria serbisu sira ne'ebé presta bá ita nia povu," nia dehan.
Hugo dehan, rezime ne’ebé eziste daudauk ne’e la ezije reforma obrigatoriu ba FP ho idade tinan 60.
Maibé ho proposta Lei ne’e, FP ho idade tinan 60 ba reforma obrigatoriu.
"Entaun aprezentasaun ida ohin hodi fiksa idade 60 anos ba reforma obrigatoriu. Ita hotu hatene rezime ne'ebé ke eziste durante tinan barak nia laran la'os obrigatoriu 60 anos, durante ne'e hala'o serbisu hela no la rekere nia direitu atu reforma," nia dehan.
