Prezidente Repúblika hatete, nia halo koordenasaun ho Ministériu Justisa kona-ba lista ba prizioneiru ne’ebé sei hetan indultu iha 20 Maiu ne’e.

"Sim, ha'u halo koordenasaun ho Ministériu Justisa, governu, tanba tuir lei governu tenke aprova lista, mais la signifika balun governu la aprova karik la signifika ha'u mós la aprova, la'e, ha'u bele halo desizaun seluk.”

“Mais liu-liu kuitadu inan ruma hanesan inan ida ho oan iha prizaun Gleno ne'e kuitadu tenke haree oinsá bele indultu, bele sai, no seluk tan. Purtantu ne'e ami haree tiha ona, haree daudaun, ha'u sei fó indultu ba prizoneiru sira. Ha'u la lembra, hanoin 100 resin nune'e," dehan PR Horta, ba jornalista sira hafoin partisipa iha serimónia ‘Open Office Reception’, iha Embaixada Brunei Darusalam, Timor Plaza, Tersa (07/05).

Molok ne’e, Ministru Justisa, Sergio da Costa Hornai informa, nia parte simu ona lista indultu ba prizioneiru 80 to’o 100 resin.

Hafoin simu lista ne’e, nia dehan, nia parte sei halo ezersisiu molok haruka lista ba Primeiru Ministru, Kay Rala Xanana Gusmão.

“Ita halo ezersisiu oinsa atu bele kanaliza lista sira ne’e ba iha Primeiru Ministru nia liman, no Primeiru Ministru iha nia kompetensia konstituisionál, politika atu bele fó indultu no fó komutasaun pena, maibé depende ba lista sira ne’ebé mak ita aprezenta ba,” dehan Sergio iha salaun MJ, Segunda (29/04).