“Desizaun ne’e la afeta ba relasaun bilaterál rai rua. Ita tenke respeita desizaun Prezidente Repúblika PR no komprende dinámika polítika iha Timor-Leste”, dehan nia iha Palásiu Prezidensiál Bairru-Pité, horisehik.

Tenke respeita ida ne’e, tanba sei iha oportunidade barak liu atu dezenvolve iha futuru entre nasaun rua, liuliu iha kontestu no dinámika demokrasia sei fó mós oportunidade ba Lú Olo atu vizita Indonézia.

Embaixadór Sitorus mós iha esperansa, hafoin tomada-de-pose, Jokowi bele halo mós vizita mai iha Timor-Leste atu bele hametin liután ajenda kooperasaun rai rua nian.

Sitorus dehan, Prezidente Joko Widodo mós hameno katak, asuntu sira ne’ebé diskute ona iha Jullu 2018 iha Bogor Indonézia ho Prezidente Repúblika Lú Olo presiza kontinua iha futuru.

Nia dehan, objetivu enkontru ho Prezidente Repúblika Lú Olo atu esplika kona-ba novidade polítika ne’ebé akontese ona, liu-liu dinámika polítika iha kontestu demokrasia relasiona ho konvite husi Prezidente Repúblika Indonézia, Joko Widodo espesiál ba Prezidente Repúblika Lú Olo atu partisipa iha tomada-de-pose.

Maibé, dinámika polítika demokrasia iha Timor Leste deside katak Prezidente Repúblika labele atende konvite ne’e hodi partisipa serimónia importante ne’e. Durante enkontru, Prezidente Repúblika Lú Olo esplika maski ho situasaun ne’e laiha impedimentu ba nasaun rua atu kontinua hametin no dezenvolve kooperasaun iha aspetu hotu-hotu.

Prezidente Repúblika Lú Olo esplika direita kestaun ne’e ba Sitorus nu’udar reprezentante espesiál Prezidente Joko Widodo iha Timor Leste.