Tuir Diretóra Ezekutiva NGO Ba Futuru, Juliana Oliveira Marçal, hateten, ko’alia kona-ba asuntu labarik, presija ema hotu nia atensaun, liu-liu ba governu tenke tau matan no inan-aman iha papel importante atu kontrola no tau matan ba oan sira.

 “Ba inan-aman sira mós foti papel importante atu bele tau matan ba labarik sira hotu, hanesan ita haree problema labarik nian agora daudauk ita hasoru, iha ita nia nesesidade uma laran nian, entaun hanesan nasaun ne’ebé  ratifika ona Konvensaun Diretu Labarik nian, iha diretu tomak, atu bele asegura ida ne’e, saida mak nasaun ida ne’e hanoin atu bele halo hodi próteze labarik sira nia diretu no enkoraja labarik sira, hodi bele partisipa iha edukasaun, duke labarik sira halo servisu todan,” dehan nia iha ambitu komemorasaun loron mundial labarik sira nian, iha Komoro, kuarta horseik (01/06).

Nia hatutan, problema labarik sira nian, ne’ebé dadauk ne’e eziste iha sosiedade mak, labarik barak sai vítima husi familia tanba nesesidade obriga, sira halo servisu, buka osan hodi sustenta uma-laran no haree ba sira nia eskola rasik.

Tanba ne’e, Diretóra Ezekutiva, husu ba Parlamentu Nasional no Governu atu bele halo diskusaun ba lei protesaun ba labarik no foinsa’e ne’ebé iha risku, atu bele hetan aprovasaun.

Nune’e, bele proteze labarik sira atu labele sai vitima no mós foinsa’e sira iha risku.

Iha fatin hanesan, Reprezentante Adjunta UNICEF iha Timor-Leste, Ainhoa Jauregui Beitia, haktuir, iha Timor-Leste, problema ne’ebé labarik sira dala ruma hasoru mak, violensia iha familia, sosiedade no dala ruma iha eskola.

Nune’e, presiza fó formasaun ba inan-aman no manorin sira atu iha kuiñesementu klean, hodi fó espasu seguru no protesaun ne’ebé diak ba oan sira.

“Bainhira labarik sira ne’ebé mak moris iha ambiente ne’ebé mak saudavel ou la ho violénsia maka sira bele dezenvolve sira nia koñesimentu no intelektuál, emosionál no psikolojia ho diak,” tenik nia.

Aleinde, nia dehan, labarik sira mós presiza iha rejistu moris atu nune’e sira bele asesu ba direitu hotu.

Nia akresenta, UNICEF  nafatin fó apoiu ba Komisaun F atu halo revizaun ba lei ne’ebé pendente hela, bainhira remata, sei aprezenta ba iha Parlamentu Nasional no halo diskusaun iha plenaria hodi hetan aprovasaun.

Nune’e, labarik sira no foinsa’e ne’ebé iha risku nia laran bele hetan protesaun no bele sira nia diretu ho diak.