PR Horta hatete, ema balun koalia kona-ba traballu infantil iha Timor-Leste, maibé Horta la konsidera ida ne’e nu’udar traballu infantil.
“Ema balun dehan traballu infantil, ha'u hatene traballu infantil saida tanba ha'u prezidente ba grupu internasionál ida naran Premiu Nobel no Lider Globais, líder mundiál direitu labarik sira nian, entaun ha'u koñese traballu infantil saida, iha Timor ha’u lakohi ko'alia traballu infantil tanba primeiru sira ba eskola, ba dadeer, ba lokraik, se sira ba (eskola) lokraik, dadeer sira faan manu-tolun, balun sira faan manu-tolun ne'e sira-nia família nian rasik fó ba sira faan atu ajuda familia,” dehan Horta hafoin fahe prezente ba labarik sira iha palasiu Prezidente Repúblika, Bairo-pite, Kuarta (01/06).
Tuir Horta, iha Timor-Leste maske labarik barak mak halo negosiu maibé kontinua eskola la hanesan ho labarik sira iha nasaun sira seluk.
"Faan manu-tolun la'ós servisu todan maibé dezde labarik ne'e, nafatin eskola, tanba ha'u ba to'o labarik balun nia uma ba haree iha Merkadu Komoro ne'eba ha'u haree. Traballu infantil mak halo iha Banglades, Pakistan, India, Amérika Latina, ne'e todan tebtebes no ne'e krime ida,” dehan Horta.
Horta hatete, labarik sira faan manu-tolun ka buat seluk ne'e lá'os todan, sira ajuda inan-aman no hanesan eskola ida ba sira.
"Sira kiik aprende kedas business, tinan lima, 10 tan sira businessmen, se haree oinsa mak tulun sira halo business sira ne'e, oinsá mak labarik sira faan manu-tolun ne'e ita bele ajuda sira,” dehan nia.
Xefe Estadu ne’e dehan, nia hakarak haree labarik sira sai businessmen tanba iha Amérika labarik balun ho idade tinan 11 sai ona milionariu.
“Governu, estadu buka apoia labarik sira ne'e atu sira matenek liu, balun ha’u koñese labarik matenek loos, sira hatene halo business,” dehan nia.
Maske nune’e, Horta preokupa mós ho situasaun labarik sira iha munisipiu seluk hanesan Ermera no Oekusi ne’ebé pior liu munisipiu Dili.
“Maibé UNICEF aprezenta ona planu ida iha tinan lima nia laran, se governu apoiu planu UNICEF nian traballu infantil bele taka iha tinan lima nia laran.”
"Planu UNICEF nian ne'ebé ha'u apoia 100% atu kobre Timor-Leste tomak, $10 milloens pur anu, durante tinan lima $50 Milloens, ha'u hein atu oinsá governu ho UNICEF atu haree planu ida ne'e," hatete nia.
Deputadu Kestiona Seriedade Governu
Entretantu, iha Parlamentu Nasionál, relasiona ho loron internasional ba labarik sira ne’ebé monu iha 1 Juñu, deputadu sira husu Governu atu hatudu seriedade ba protesaun ba labarik sira.
"Loron internasional atu halo reflesaun lideransa tomak, governantes tomak no Ministeriu relevantes atu haree politika saida bele halo atu proteze labarik sira ho di'ak. Iha Parlamentu Nasional halo lei saida mak bele proteze labarik sira ho di'ak no fó seguransa ba labarik sira ho di'ak," dehan Deputada Bankada Partidu Demokratiku (PD), Elvina Sousa Carvalho, iha PN, Kuarta (01/06).
Tuir nia, labarik iha TL mesak matenek, maibé labarik lubuk ida mak moris iha situasaun ida ne’ebé la devia akontese.
"Devia tempu agora sira ba eskola no ambiente ida ne'ebe ke di'ak atu dezenvolve sira-nia matenek. Maibé dala-barak labarik lubuk ida mak la eskola hodi ajuda inan-aman no balun mós sira-nia hakarak rasik sai husi eskola ba fa'an dose, modo no manu-tolun," dehan nia.
Tuir loloos, nia dehan, iha tempu estra labarik sira iha uma atu estuda no hala’o atividade sira ne'ebé mak di'ak hodi dezenvolve sira-nia an.
"Ha’u hanoin Komisaun Labarik iha no Ministeriu Solidariedade Sosial no Inkluzaun sira hotu iha papel atu proteze labarik sira. Maibé realidade moruk ida mak ne'e ita moris tenke haree, dala-ruma ita bele ko'alia, maibé ekonomia familia ne'e susar uitoan," dehan nia.
Tuir nia, governu iha dever tomak atu proteze labarik hodi labele kontinua servisu todan, tanba agora ne'e tempu ba sira atu eskola no estuda.
"Parlamentu Nasional agora halo projetu lei Protesaun Labarik no Foinsa'e iha Perigu, aprova ona iha jeneralidade no agora hein diskusaun espesialidade hodi aprova final Global. Hanoin lei kuandu aprova no promulga husi Prezidente Republika bele ona proteze labarik sira," nia dehan.
Iha fatin hanesan, Prezidente Bankada CNRT, Duarte Nunes hatete, labarik sira mak futuru joven no futuru lideransa nasaun nian, tanba ne'e Governu presiza tau atensaun.
"Ne'ebe ha'u-nia hanoin ita hotu nia preokupasaun atu sira hetan nutrisaun di'ak, formasaun di'ak no edukasaun di'ak atu depois sai lider ne'ebé di'ak. Ida ne'e mak sai politika ita hotu hakarak," nia hatete.
Deputadu ne’e hein katak Prezidente Republika ne'ebé mak hakarak fó atensaun ba labarik sira bele iha atensaun ba Orsamentu Jeral Estadu ne'ebe atu mai nune'e parte hotu-hotu kompleta malu atu fó atensaun didi'ak ba labarik sira hodi hetan saude di'ak.
Prezidente Bankada Khunto, Olinda Guterres husu ba labarik sira ne'ebé la'o iha estrada ninin atu labele lakon oportunidade ba eskola.
"Balun ha’u haree sei fa'an manu-tolun, sigaru, ha’u-nia mensajen ba sira mak ne'e, di'ak liu para fa'an sasan, kontinua eskola, tanba tempu agora eskola, di'ak liu ba eskola," dehan nia.
