Ministru Koordenadór Asuntu Ekonomikus (MKAE), Joaquim Amaral hatete, governu sei haree atu rezolve salariu minimu ne’e molok mandatu remata.

"Ita sei haree rezolve antes mandatu ne'e hotu, iha ona planu lejislasaun, elementu sira ne'e hotu sei tama ánaliza ba diskusaun, ne'ebé ha'u labele espekula uluk sa'e hira, maibé tama ona iha planu atu bele haree oinsa hola desizaun ba ida ne'e," dehan Joaquim ba jornalista sira hafoin akompaña Prezidente Repúblika José Ramos Horta fila husi Brazil, iha salaun VIP Aeroportu Internasionál Nicolau Lobato Komoro, Sesta (06/01).

Maske la anunsia mudansa valor husi salariu minimu, maibé ministru ne’e hatete, governu fixa saláriu mínimu atu ema sira ne'ebé servisu iha nia kontratu regula ho saláriu mínimu ne'ebé estadu estabelese.

"Ha'u hanoin ita servisu tuir kalendáriu ne'ebé iha, tau ona kalendáriu konserteza ita servisu ba kalendáriu dentru mandatu ne'ebé governu iha," hatete nia.

Molok ne’e, Prezidente Konfederasaun Sindikatu Timor Leste (KSTL), Almerio Vilanova informa, Parlamentu Nasionál aprova ona revizaun saláriu minimu maibé la hanesan uluk, tanba pakote ida ho GOP.

"Uluk ne'e saláriu minimu pakote, depois ba Konsellu Ministru, maibé agora halo pakote ida ho GOP, sei Implementa iha 2023," dehan nia via telefone, Sesta (30/12).

Almerio dehan, salariu minimu ne’ebé PN aprova iha GOP mak $135 no sei implementa iha tinan 2023.

"Iha ne'ebá hatete salariu minimu $135 sei implementa iha 2023, agora kestaun mak governu sei Implementa iha sa fulan?”.

“Hotu-hotu hatene  mandatu governu nian atu hotu ona, dala-ruma iha fulan Fevereiru ba leten ne'e komesa foku ona ba iha konsolidasaun hodi prepara ba kampaña Parlamentár ni'an. Entaun buat sira hanesan ne'e sira bele la tau prioridade hodi implementa, ida ne'e mak KSTL dúvida," tenik nia.

KSTL, nia hatutan, tenta ko'alia ona ho Sekretáriu Estadu Formasaun Profisionál no Empregu (SEFOPE) maibé SEFOPE ladún iha konesimentu ba saláriu minimu $135 ne'ebé aprova ho pakote GOP.

“Entaun iha fulan hirak liu ba SEFOPE, Kámara Komérsiu Indústria, no KSTL reniaun fali ho Ministru Koordenadór Asuntus Ekonómikus (MKAE) Joaquim Amaral no nia mós hatete katak saláriu minimu $135 ne'e hamutuk ona iha GOP.

Maibé kestaun mak husi Konsellu Nasionál Traballu momentu aprezenta ba MKAE ne'e salariu $150.

"Parlamentu Nasionál ho Governu diskuti iha ne'ebá, ita la hatene ninia prosesu la'o hanusa, ikus mai ita rona dehan $135 iha GOP, sei Implementa iha 2023, sa fulan mak ita seidauk hatene klaru," dehan nia.

Hatan kona-ba saláriu minimu $135 bele atende ona traballadór sira-nia moris, nia argumenta, iha 2012 KSTL hakerek karta ida ba SEFOPE atu halo proposta hodi halo revizaun saláriu minimu ba $200.

"Ami rekomenda ne'e bazeia ba peskiza, maibé husi governu dehan ita halo peskiza lai, entaun husi 2012 to'o 2020 ita konsege finaliza peskiza ne'e ho Kámara Komérsiu Indústria ami akordu saláriu minimu $150," nia haktuir.

Nia reforsa, tanba momentu ho razaun katak Timor-Leste situasaun Covid nia laran, afeta ekonómia rai laran, entaun sa'e ba $150, hot-hotu aseita  haruka ba MKAE.

"Maibé ami hatene $150 ka $200 mós la sufisiente ba traballadór sira. Atu fó moris dignu ba família ida iha fulan ida nia laran," Nia reforsa.

Tuir nia, iha situasaun ohin loron, saláriu minimu ne'e $200 ba leten mak konsidera hanesan saláriu dignu ba traballadór, saláriu ida ne'ebé mak fó moris di'ak ba traballadór ho nia família.

Entretantu, Ministru Finansa (MF) Rui Augusto Gomes hatete, Governu propoin ona saláriu mínimu ba $135 iha Lei GOP, ne’ebé foin lalais aprova ona iha Parlamentu Nasionál (PN) no promulga ona hodi Prezidente Repúblika.

"Foin lalais Parlamentu Nasionál aprova tiha ona Lei Grande Opsaun Planu, iha ne’ebá estimula saláriu mínimu sa’e ba $135," informa Ministru Rui iha PN.

Ministru ne’e hatete, iha tinan 2023 bele implementa planu ne'e, maibé bainhira hasa'e saláriu mínimu sei lori impaktu ba veteranu sira tanba sei hasa’e mós sira-nia subvensaun.

"Keta haluha katak ida ne'e sei iha impaktu boot tebes, tanba kuandu saláriu mínimu sa'e, signifika mós iha impaktu ba veteranu sira, entaun kuandu sa’e $135, veteranu sira mós sei sa’e sira-nia subvensaun, ne'e signifika katak tuir ami-nia kálkulu pur volta millaun $20 só ba de'it veteranu sira, tanba iha aumentu iha saláriu mínimu," katak nia.