Arsebispu ba Arkedioseze Metropolitana Dili, Don Virgílio do Carmo da Silva, SDB, liuhusi Sekretariadu Kâmara Eklesástika lansa tiha ona komunikadu ba imprensa kona-ba suspensaun misa iha parókia 11 ne’ebé tama iha área Munisípiu Dili nian tanba governu aprova ona serka sanitária no konfinamentu obrigatória hodi prevene moras daet COVID-19.
“Atu bele contribui ba sucesso husi Cerca Sanitária no Confinamento Obrigatório, tanba ne’e, Ha’u hakarak fó hatene no husu ba Reverendo Pároco, Padre sira, Religioso, Religiosa no Sarani sira, katak hahu husi 09-15 de março de 2021, ita mos sei suspende Missa sira Diária, Dominical ba público no Serviço Cartorial iha Paróquia sira iha Munisípiu de Dili de’it,”dehan Arsebispu ba Arkedioseze Metropolitana Dili, Don Virgílio do Carmo da Silva, SDB, liuhusi Sekretariadu Kâmara Eklesástika lansa tiha ona komunikadu ba imprensa ne’ebé Online Independente asesu, ohin.
Desizaun ne’e tuun hafoin Governu liuhusi Konsellu Ministru halo desizaun iha loron 08/03/2021 ba serka sanitária no konfinamentu obrigatóriu iha sidade Dili duran loron-hitu hahú husi loron Tersa (09/03/2021) to’o loron Segunda (15/03/2021).
Don Virgílio hatete, Parókia sira ne’ebé halo parte iha Munisípiu Dili, hanesan: Atauro, Aimutin, Balide, Becora, Bedois, Catedral, Comoro, Dare, Hera, Metinaro no Motael, atu implementa orientação ida ne’e iha ida-idak nia fatin.
“Ba imi hotu nia kolaborasaun Ha’u hato’o obrigadu wain. Mai ita hotu reza husu Maromak nia tulun ho Nain Feto Maria Virgem, Timor nia Liurai Feto no São José, Aman Igreja Universal nia harohan daet, atu hadook lalais ita husi moras ne’e,”Arsebispu haklaken.
Entretantu tuir medidas prevensaun durante periodu serka sanitária no konfinamentu obrigatóriu, mak bandu atu realiza kualker atividade sira ne’ebé ho karater sosial, kultural, desportiva no religiosa, ne’ebé bele halibur ema barak, uza masakara, distansia sosial kuaze minimu metru 1.5, la halo movimentasaun bainhira la nesearia no bandu ema halo viazen sai husi Dili ba munisípiu seluk exeptu ekipa sira ne’ebé transporta aimoruk, aihan no seguransa.
“Maibé só iha autorizasaun husi ministériu interior no husi Sentru Integradu Jestaun Krize (SIJK),” Fidelis hatete,”dehan Ministru Presidénsia Konsellu Ministru, Fidelis Magalhaés, antes ne’e.
Tuir dadus atual ne’ebé Sala Integradu Jestaun Krize (SIJK) relata iha loron segunda-feira (8/3) katak, pasiente sae ba na’in 35, ne’ebé baixa hela iha sala izolamentu Vera Crus Dili.
