Tuir Vise-Koordenadora Forsa-Tarefa ba Prevensaun no Mitigasaun Surtu Covid-19 iha Timor-Leste, Odete Maria Viegas informa, hafoin deteta kazu foun rua iha bairru BTN II, Tasi Tolu, Suku Madohi, Postu Administrativu Dom Aleixo, to’o horseik ekipa konjunta saúde buka tuir nafatin ema ne’ebé kontaktu besik ho sira husi kazu rua ne’e.
“Dadus jeral ne’ebé hatudu, pasiente Covid-19 ne’ebé agora dadauk baixa hela iha Sala Izolamentu Vera Cruz hamutuk 48,”dehan nia iha konferensia imprensa,CCD (9/3).
Nia esplika, husi ezersisiu ne’ebé ekipa konjunta saúde halo, ohin deteta tan kazu 9 husi kontaktu ne’ebé besik ho kazu husi sidadaun ida-ne’ebé nu’udar funsiunáriu administrasaun públika iha SEFOPE.
Kazu pozitivu ida husi Bebonuk ne’ebé relata horseik iha loron 8 fulan marsu, husi kazu ne’e mós ekipa konjunta saúde halo kedas rastreiu horseik no rezultadu rastreiu ne’e hatudu kazu Positivu ida iha Bebonuk.
Nune’e, ekipa konjunta saúde halo mós rastreiu iha fatin risku iha Óspital Nasional Guido Valadares deteta kazu 3, husi kazu 3 iha Óspital Nasionál ne’e kompostu husi professional saúde na'in ida ho nia-oan na’in rua.
Dra. Odete mós informa ba públiku katak atividade rastreiu seletivu massa horseik 8 marsu amostra ne’ebé ekipa foti hamutuk 471. (Husi SEFOPE amostra ne’ebé rekolla hamutuk 28, Ministériu Transporte no Komunikasaun 137, TIC 46, Bebonuk 51, Ministériu Finansas 82, Óspital Nasionál 3 no Gabinete Primeiru-Ministru 124).
Ohin, ekipa konjunta saúde kontinua nafatin buka tuir kontaktu-besik iha SEFOPE, MTC, HNGV nomos Bebonuk. Ita hein rezultadu iha loron hirak tuir mai.
Husu mós ba estidades hotu-hotu populasaun ka komunidade atu bele kumpri medida prenvensaun Covid-19.
Husu ba populasaun iha Dili laran tomak atu nafatin kalma, lalika pániku, hela deit iha uma wainhira laiha nesesidade atu halo movimentu bá-mai, pratíka nafatin medida sira ne’ebé ita hotu hatene ona:
- a) Uza máskara
- b) Fase liman bebeik ho sabaun ka dezinfetante ruma
- c) Wainhira kumprimenta malu, lapresiza kaer-liman, bensa-liman, rei-malu ka haku’ak malu
- d) Evita halibur malu barak
e) Hamri’ik ka tur dook husi ema seluk, mínimu metru ida ho balu
