Aprezentasaun planu ne’e liu-hosi enkontru ho Xefe Governu iha Palásiu Governu, Díli, sábadu (31/08/2024).

“Ha’u iha planu atu halo fime kona ba ístoria luta Timor-Lest nian durante tinan 24 nia laran. Objetivu halo filme ne’e atu bele sai hanesan istória ba jerasaun foun nasaun ne’e nian iha future,”Ian White hateten, iha komunikadu ne’ebé Online INDEPENDENTE asesu, sabado ne’e (31/08/24).

Ian White sei servisu hamutuk ho Governu no populasaun Timor-Leste nian hodi halo filme ne’e tanba maski nia hela iha Austrália, maibé nia akompaña istória Timor nian iha tempu naruk nia laran.

“Ha’u nia kompañia I-witness ninia misaun mak halo filme. Ne’ebé produsaun filme ne’e sei servisu hamutuk ho kompañia australianu, governu no populasaun Timor-Leste,” nia hateten.

Produsaun filme ne’e sei la’o durante tinan-rua no sei entrevista lider nasaun nian to’o populasaun baibain.

Autór filme ne’e sente kontente no admira haree dezenvolvimentu iha Timor-Leste ne’ebé estraordináriu tebes iha área oioin.