"Subsidiu 200 ne'e di'ak liu fó de'it ba komunidade ne'ebé empregu laiha ka sira-nia vensimentu ne'e kiik loos, ne'e solusaun ida. Solusaun seluk, ita ida-idak ho ita nia konxiénsia fó osan ne'e ita fó tun ba sira ne'ebé osan laiha," dehan nia, iha Aeroportu Internasionál Nicolau Lobato, Komoro, horisehik.
Nia dehan, ninia saláriu 50% sei fó ba organizasaun balun ne'ebé tau-matan ba ema ki’ak sira ne'e hahú kedas iha fulan-Juñu, seidauk fó osan ne'e akumula hela to'o fulan-Novembru ka Dezembru mak entrega no ne'e lá'os primeiravez.
"Ha'u nia primeira prezidensia mós uluk ha'u-nia vensimentu ne'e ki’ik, alende perdiem ha'u simu, perdiem balun ha'u la gasta, tanba governu sira selu ha'u-nia otel, balun gasta duni," hatete nia.
Nia haktuir, hanesan Novaiorke laiha governu ida mak selu, maibé fatin balun nem duit metan ida Xefe Estadu gasta, maibé iha direitu ba perdiem ne'e mós entrega ba fundu espesiál ida konta mós espesiál prezidensia depois fahe ba individual ka organizasaun ruma ne'ebé servisu di'ak, tau-matan di'ak ba kiak sira.
Ho ezemplu ne'e, hotu-hotu ne'ebé manán pelumenus US$ 1.000 ba leten, see governu hatete hotu-hotu simu duni, entaun ita fó tiha osan ne'e US$ 200 kontribuisaun natál ki’ak sira, maibé di'ak liu halo desizaun polítika ida hanesan primeira ajuda espesiál governu fó iha 2020 ne'e ba de'it sira ne'ebé manán menus US$ 500 ida ne'e mak di'ak liu.
Molok ne'e, Governu liuhusi reuniaun Konsellu Ministru iha Kuarta (28/9) aprova ona projetu Dekretu-Lei, numeru 37/2022, kona-ba fó subsídiu US$ 200 ba uma-ka’in sira iha fulan-Dezembru.
Desizaun hodi atribui subsídiu ba uma-ka’in sira hotu, ne’ebe halo ona rejistu to’o loron 28 fulan-Fevereiru 2022, independentemente husi sira iha situasaun vulneravel ka lae nomos ka husi sira iha membru balu ne’ebe fó atividade profisionál iha ámbitu administrasaun públika nian ka lae.
Tuir dadus husi Ministériu Adminitrasaun Estatál (MAE) submete ona uma ka’in hamutuk 39.110 ba Mnistériu Solidariedade Sosiál no Inkluzaun (MSSI) ho nia osan ne’ebé prevee mak tokon US$ 700. Subsídiu ne’e universalmente katak, uma ka’in hotu-hotu iha territóriu nasionál sei hetan subsídiu ne’e.
Entretantu, iha dekretu-lei 37/2022, kona-ba (Subsidiu de Fim de Ano Aos Uma Ka'in) iha artigu 1 alinea 2 ne’e hateten, subsidiu fim do ano ba uma-ka’in ne’ebé mak vulneravel liu iha Timor-Leste.
Dekretu-lei ne’ebé hanesan, iha fali artigu 2 ne’e, haktuir benefisiáriu ba subsídiu anuál ne’e ba uma-ka’in sira-ne’ebé rejistu ona no iha “Livru Rejistu Uma Ka’in” iha suku ida iha territóriu nasionál previstu ona iha Diploma Ministeriál Númeru 49/2017.
Tuir Planu iha loron 16 Novembru 2022, sei lansa subsídiu fim do ano US$ 200 ba uma-ka'in.
