Tuir informasaun, total asesor ne’ebé haknar an iha Parlamentu Nasionál (PN) hamutuk na’in 39, kompostu husi asesor nasionál na’in 7 no asesor internasionál na’in 32.
Sekretáriu Jerál PN, Adelino Afonso de Jesus informa, totál asesor nasionál no internasionál iha PN hamutuk na’in 39.
"Asesor internasionál 32 no nasionál 7, asesor laiha grau, maibé iha de'it mak nasionál no internasionál," dehan nia iha PN, Kinta (29/09).
Kona-ba razaun PN uza asesor internasionál barak, nia esplika, tanba PN nia servisu ne'e iha área direitu nian.
"Ita hotu mós hatene dehan katak ita-nia lisensiadu direitu ne'ebé prontu atu fó asesoria prodúsaun leis ho regulamentu ne'e reduzidu tebtebes. Agora dadauk esforsu atu redus, maibé la'ós agora," kata nia.
Tuir nia, asesor internasionál no nasionál iha PN ne’e hala’o ona servisu dezde Asembleia Konstituinte to'o agora.
"Salariu ne'e sempre iha bens no servisus iha sub-titulu servisus teknikus," dehan nia.
Kona-ba preokupasaun husi deputadu sira ba salariu asesor, Sekjer PN ne’e rekuza hodi fó resposta.
"Ida ne'e ha'u la responde nem buat ida, tanba ne'e linguajen ho Partidu Governu. Purtantu ita-boot (jornalista) sira labele esplora situasaun ida ne'e," dehan nia.
Molok ne’e, Konsellu Administrasaun Parlamentu Nasionál deside hodi hasa’e salariu ba asesor nasionál no internasional Parlamentu Nasionál nian. Tuir desizaun ne’ebé públika ona iha Jornal Repúblika, salariu minimu ba asesor mak $6.500 no salariu masimu mak $20.000.
Tuir desizaun ne’e, iha diferensia entre salariu ba asesor nasionál no asesor internasional.
Asesor nasionál sei simu salariu husi $6.500 to’o $8.000 no asesor internasionál sei simu salariu husi $17.500 to’o $20.000.
Maske desizaun ne’e públika ona iha Jornal Republika maibé seidauk implementa tanba presiza hatama ba orsamentu Parlamentu Nasionál (PN) nian iha Orsamentu Jeral Estadu 2023.
Deputada bankada CNRT, Carmelita Moniz konsidera salariu ba asesor sira ne’e demais liu.
"Asesor nasionál ne'ebé grau akademiku doutoramentu iha esperiénsia mais tinan 15 nia saláriu minimu $6.500, masimu rihun $8. Asesor internasionál grau akademiku doutoramentu esperensia mais tinan 8, saláriu minimu $17.500 masimu rihun $20," dehan nia iha Parlamentu Nasionál, Tersa (27/09).
Deputada ne’e dehan, nia la konkorda no lamenta ho desizaun KA PN hodi hasa’e salariu ba asesor sira.
"Prezidente Parlmentu, ha'u sente la konkorda no lamenta uitoan ho desizaun Konsellu Administrasaun ita nian ne'ebé sai ona iha Jornál da Repúblika liu husi desizaun númeru 73 kona-ba tabela salariál ba asesores Parlamentu Nasionál," dehan nia.
Carmelita kestiona, asesor sira ne’e atu halo saida, tanba deputadu no membru iha komisaun sira hatene sira-nia servisu.
Nia hatutan, PN iha Timor-Leste la hanesan ho PN iha rai sira seluk ne’ebé buat hotu asesor mak prepara no deputadu sira hein ba koalia de’it.
"Purezemplu Estadus Unidus no pais sira seluk, ema halo hotu tiha mak ita ba ko'alia de'it iha plenária. Maibé ita nian la'e, liu-liu komisaun A, ita tenke buka rasik no halo rasik, asesor ajuda ita ba língua de'it,” dehan nia.
Tan ne’e, nia hatete, nia sei halo proposta hodi hapara bainhira Prezidente PN tau duni desizaun husi KA PN ne’e iha orsamentu ba PN nian iha OJE 2023.
"Ita-nia osan estadu ne'e atu fó ba asesor sira ne'e iha Orsamentu 2022 rihun $100 ba leten, ba de'it halo pagamentu ba asesor sira ne'e, ne'ebé favór ida Parlamentu Nasionál tetu hikas polítika sira ne'e," dehan nia.
Hatan ba kestaun ne'e, Prezidente PN, Aniceto Longuinhos Guterres Lopes hatete, ajustamentu saláriu asesor nasionál no internasionál ne’e bazeia ba Dekretu Lei ka Lei ne'ebé governu iha.
"Tanba saida mak tenke adapta no ajusta ho Governu ninian, tanba iha esperiénsia, iha asesores potensiál barak, depois sira inklina liu hakarak ba servisu iha governu, tanba iha ne'ebá oferese saláriu di'ak liu, tantu nasionál no Internasionál," dehan nia.
Tanba oferta hanesan ne'e no situasaun hanesan ne'e, Aniceto dehan, la favorese ba PN atu hadi'a kualidade servisu.
"Enkuantu governu ninia rekursus barak liu oinsá mak ita Parlmentu nasionál hola inisiativa, ita-nia rekursu no haree nia klase, ema di'ak ne'e hakarak ba iha governu," katak nia.
Tuir nia, asesor sira ne’ebé servisu iha PN ne’e segunda no terseira klase tanba sira ne’ebé klase di’ak hili liu governu.
“Ida klase di'ak ni'an ne'e Parlmentu Nasionál la hetan tanba diferensia saláriu hanesan ne'e. Maibé ida ne'e ajusta de'it tuir lei, ne'ebé ita ko'alia kona-ba diskripansia entre asesores nasionál ka Internasionál ne'e, ita tenke hadi'a husi lei ne'ebé mak estabelese tabela salarial tantu governu no Parlamentu Nasionál," dehan nia.
Aniceto hatete, maske KA PN aprova ona, maibé seidauk hatene bainhira mak atu impelemnta.
“La hatene komesa tinan oin mak Parlamentu Nasionál halo karik. Ida ne'e apenas desizaun ida ne'ebé Konsellu Admistrasaun hasai no seidauk iha asesor ida selu tuir ida ne'e, pelumenus to'o agora ne'e. Governu nian kala sira goza ona benefisiariu sira karik."
