Xefe Unidade Kardiolojia, Cesaltino Leão hateten, Goveru harii sentru kardiaku ne’e atu redús transferénsia pasiente ba rai li’ur no halo atendimentu mais adekuadu liu, iha rai-laran rasik.

“Maibé, diagnóstika iha osptiál ne’e kleur ona no ida ne’e seidauk sufisiente loos. Tanba pasiente mai ho moras fuan ne’e tipu oi-oin, hanesan bainhira pasiente mai ho moras koroner atu halo diagnóstiku tenke liu husi modalidade oi-oin,” nia hateten iha knaar fatin, Kuarta (06/07/2022).

Atendimentu moras fuan iha ospitál foin to’o eko kardiografu ne’ebé baze liu, atu ba médiu maibé sei falta buat barak.

Maski nune’e husi ida ne’e bele ajuda médiku sira halo dagnóstiku no identifika refere pasiente ne’ebé persiza.

“Eskala ne’ebé ita bele halo ita ospitál, barak liu konservativu uza ai-moruk, se identifka iha obstrusaun boot ita labele halo iha ne’e, tenke transfere ba rai li’ur,” nia informa.

Alende ne’e, ospitál nasionál mós seidauk iha kuidaus intensivu bainhira pasiente ida mai ho atakasaun fuan tenke baixa iha  Cardi Care Unite (CCU), maibé to’o ohin loron seidauk iha, bainhira pasiente baixa tenke tau hamutuk iha ICU nian, ida-ne’e mak koko atu haree.

Enkuantu, durante fulan lima nia laran hahú husi Janeiru to’o Maiu 2022 nia laran, pasiente ho moras fuan ne’ebé halo tratamentu iha ospitál hamutuk hotu 3.795, husi númeru ne’e pasiente foun 1.059 no pasiente kontrolu 2.736.

Tuir nia, haree husi númeru dadus ne’e, moras fuan ne’ebé akontese barak tanba, life style husi komunidade rasik baruk atu halo ezersisiu, han hahan la tuir dalan, ikus hamosu komplikasaun tensaun aas, inklui remátika hafoin la hetan tratamentu adekuadu. Kona-bá dadus mate, nia parte seidauk prepara.