"Munisipiu Likisá hahú halo lansamentu ba prosesu atu selu ita nia inan-aman no defisiénsia, ne'e prosesu ida importante loos, tanba kontribuisaun ida ne'e hodi ajuda ita nia inan-aman no defisiénsia sira, atu hatutan sira nia moris,"  Primeiru Ministru (PM) Taur Matan Ruak hateten ba jornalista sira.

Tuir dadus, benefisariu sira iha  Timor laran tomak hamutuk na'in 103.000 ho orsamentu montante millaun $62.

"Tanba ne'e ha'u hakarak lori mos governu nia naran apresia ba Ministeriu Soliriedade Sosiál Inkluzaun (MSSI) ho Institutu Nasional Seguransa no Sosiál (INSS) no ekipa tomak ne'ebé ajuda viabiliza ba pagamentu ida ne'e sei tuir mai," Taur Matan Ruak akresenta.

Taur agradese mós ba Banku Nasionál Komérsiu Timor Leste (BNCTL) ne'ebé fó sira nia ajuda pagamentu ida ne'e,  tanba ne'e la’ós fásil.

Benefisariu balun iha foho tutun ne'ebé estrada balun kondisaun a'at, ida ne'e prosesu ida realmente la fásil maibé agradese.

La fásil mós atu halo pagamentu ba idozu ho defisiénsia sira ba orsamentu $30 no aumenta $50 no kontribui husi  Parlamentu Nasionál no Prezidente Repúblika, Tanba ida ne'e, Orsamentu Jerál Estadu (OJE).

Ministra Solidariedade Sosiál no Inkluzaun (MSSI), Armanda Berta dos Santos hateten hahú tinan 2008 governu hahú implementa programa ba inan-aman ho idade 60 ba leten no ohin governu ida ne’e kontinua.

Númeru Idozu no Ema ho defisiénsia husi  Munisipiu Likisa hamutuk na'in 6.697 no  orsamentu montante rihun $67.