Enkuantu, objetivu husi formasaun ne'e mak, atu prepara membru defisiénsia matan sira kona ba lian indonézia, molok sira tuir ezame iha Indonézia, bainhira iha oportunidade.

Tuir Vise-Ministra MSSI, Signi Chandrawati Verdial, hatete, formasaun lian ba maluk defisiénsia sira ne’e, hetan apoiu husi Embaixadór Indonézia iha Timor-Leste no servisu hamutuk ho govenu liu husi MSSI.

“Ita apoiu tebes atividade ida ne'e, tanba ita hotu hatene katak, ita nia maluk defesiensia sira nia asesu ba edukasaun ne'e numeru menus tebes, purvolta ema ho defisiensia 38% ne'e, kuaze 15% mak asesu ba edukasaun, entaun ita hakarak promove edukasaun inklusivu, ita persija Fasilita formasaun iha area oi-oin," dehan nia hafoin halo abertura ba formasaun lian Indonézia, iha Edifisiu Pusat Budaya Indonézia (PBI), Mascarenhas, Balide, segunda ne’e (11/07).

Nia hatutan, atu promove edukasaun inzklusivu no inzkluzaun sosial ba ema ho defisiensia sira bainhira atu asesu ba edukasaun, presiza fasilita formasaun ba sira.

Nia haktuir, ba futuru, governu sei nafatin servisu hamutuk ho parseiru sira, atu kontinua hala’o atividade sira hanesan, fasilita formasaun ba ema ho defisiénsia sira.

Iha fatin hanesan, Embaixadór Indonézia iha TL, Okto Dorinus Manik, hateten, governu Indonézia iha komitmentu atu fasilita formasaun ba maluk sira ne'ebé persija, liu-liu ba ema ho defisiénsia sira.

Tanba, liu husi formasaun refere, sira bele hatene ona lian uituan, bainhira hetan oportunidade hodi ba tuir ezame iha Kupan-Indonézia.

"Ami prontu atu fasilita formasaun ne'e, nune'e formasaun ne'e tenki lao ho di'ak, tanba formasaun ne'e bele ajuda maluk sira tuir ezame hodi bele hasa'e level asesu iha universidade, no iha formasaun ne'e sei kontinua ho pakote C iha NTT", tenik nia.

Entrentantu, Diretór Ezekutivu AHDMTL, Gabriel Ponsiano Souza, hatete, lori membru asosiasaun defisiénsia hato'o agradese ba Embaixadór Indonézia, tanba bele fó oportunidade ba ema ho defisiénsia sira, hodi tuir formasaun lian refere.

Diretór ne’e husu, atu kontinua formasaun ne'e bele iha tinan oin mai, nune'e bele fó oportunidade ba maluk defisiensia sira seluk.

Enkuantu, formasaun lian refere sei hala’o durante fulan tolu nia laran, ho pakote C.

Formandu sira ne’e mai husi asosiasaun defisiensia matan hamutuk ema na’in nain 21 no husi ETBU ema na’in ualu (8) ne’ebé remata ona sira nia estudu ba ensinu rekorente.