Ministru Justisa, Sérgio de Jesus Fernandes da Costa Hornai hatete,  Miinistériu Justisa simu ona proposta husi Federasaun Futebol Timor-Leste ne’ebé iha interese ba fatin Tasi Tolu hodi harii estádiu foun.

“Husi ne'eba ita halo ona levantamentu balun ba iha terenu refere, maibe ita boot sira mos hatene katak iha ne'eba, iha atividade lubuk oan ida ne'ebe mak ita dezenvolve tiha ona, antes de restaura ita nia independensia, nune'e mos ita hare ba iha ita nia beleza, no mos ita nia Sua Santidade Papa na'in rua mak mai halo misa mos iha tasi tolu,” Dehan Ministru, Sergio, ba jornalista sira, iha resintu MNEK, Kinta (10/07).

Tanba ne’e, Ministru Sérgio haktuir, iha duni razaun balun ne'ebé, bele prebidensia rai atu bele halo dezenvolvimentu ba kampu futebol, ida ne'ebé bele reprezenta prestiziu nasaun ni’an.

"Tanba ita boot sira hatene muito bem katak ita nia modidade futebol juventude barak, atleta barak no ita nia ema barak, aleinde boxing iha mos atividade ida ne'e nia animo boot tebes,” Nia informa.

Nia informa, fatin refere dadaun ne'e  ema tama no sai ladun organizadu, nune'e hakarak halo fatin ne'e bele iha transversal no iha konektividade ba iha modalidade desportiva, maibe mós bele nakfilak aan ba iha ativifdade serimonial, tantu ofisial husi Estadu, no mós hanesan ema Katólika, bainhira halo selebrasaun missa solene sira-ne'ebe halo husi Uma Kreda.

“Hirak ne'e hotu ita sei haree, asesmentu no levantamentu halo dadaun husi tekniku sira, ita mos sei husu ba tekniku sira sei halo koordenasaun ho Ministeriu relevente sira ne'ebe nakait, ita mos konvida FFTL, no ema sira ne'ebe iha abilidade ne'ebe aas, atu bele halo buat ida bele reprezenta ita nia interese, maibe labele halakon tiha ita nia istoria,” Nia akresenta.

Nia adianta, parte ho Prezidente  Federasaun ko'alia hela, maibe ekipa tun dadaun atu halo avaliasaun to'o iha konkluzaun hafoin bele deside.

“Tanba ita lakohi para fatin ida ne'e, atu hases tiha pontus kolminate tolu ne'ebe mak signifikadu,ida istoria, tanba ita selebra ita nia restaurasaun dahuluk liu hanesan Republika iha fatin refere, sei halo atu bele simboliza no prezerva ida ne'e la’o ba oin," Nia haktuir.

Nune'e mos vizita santu Papa nia mai iha tempu Timor-Leste seidauk sai hanesan estadu, ida ne'e mos marka istoria ida, depois restaura independensia, Papa Francisco mai vizita dala ida tan, atu hatudu katak Timor-Leste iha fatin, atu hetan alta entidade husi Santo Papa mai iha Timor-Leste.

“Hirak ne'e hotu ita sei tau hamutuk, atu ita bele jere no halo desizaun ida adekuadu ba iha ne'eba, tanba ne'e ita presiza halo levantamentu ida, atu fo konviksaun ida, nune'e objetu beins e moveis ne'e tama iha dominu publiku ida ne'ebe, atu bele admite no fo atribuisaun ba entidade nakait, atu bele halo dezenvolvimentu,” Nia informa.