Tuir nia, iha era plataforma dijital ne’ebé dezinformasaun aumenta buras ba beibeik ho motivu polítika no ekonomia, ka motivu sira seluk ne’ebé labele kontrola, nune’e média tenke hamriik iha fileira oin hodi kombate lia-falsu no defende lia-loos.

“Média nia papél fundamentál maka atu informa públiku ho loloos, justu, no independente. Iha demokrasia joven hanesan Timor Leste, papel ida ne’e sai kritiku liutan. Dezinformasaun hafraku konfiansa públiku nian ba instituisaun sira, dezvaloriza demokrasia, no haketak, harahun, fahe ita-nia sosiedade”, dehan Cesar, iha salaun KI, Kintal-Boot, Kuarta (9/7).

Tuir nia, bainhira instituisaun sira média iha nafatin kompromisu ba lia-loos, hatuur faktu sira ne'ebé verifikadu, no tane aas jornalizmu étiku, maka sei tulun hodi kria ambiente ba sosiede ida ne'ebé bem informadu no bele reziste hasoru informasaun falsu sira iha sosiedade.