Iha 8 Abril, horseik, Primeiru Ministru Kay Rala Xanana Gusmão akompaña husi Ministra Solidariedade Sosial no Inkluzaun, Veronica das Dores, no Prezidente Institutu Nasional Seguransa Sosoal (INSS), Arlindo Pinto, halo lansamentu ba Mobile App INSS.
Tuir PM Xanana, Mobile App ne’e hanesan programa ida atu hakbesik liu tan servisu INSS nian ba sidadaun sira, liu-liu trabaladór sira.
"Ida ne’e forma ne’ebé ita halo prestasaun servisu, hakbesik an liu ba ema idaidak, traballador sira, institutu públiku no servisu privadu sira bele garantia sira-nia futuru, hetan aprezentasaun ho servisu ne'ebé di’ak duni," dehan PM Xanana liu husi nia diskursu iha serimonia lansamentu, iha salaun Multioz GMN, Bebora, Tersa (08/04).
Iha fatin hanesan, Ministra Solidaridade Sosial no Inkluzasaun (MSSI), Verônica das Dores hatete, aplikasaun ne’e atu hadia prestasau servisu no atendimentu segurança sosial ba sira ne'ebé kontribui ona.
"Tinan 2025 ita kontinua produs kartaun seguransa sosial ba traballadores hotu-hotu," dehan ministra.
Liu husi kartaun Mobile APP ne’e, sei tulun traballador sira hotu hodi bele hatene kona-ba benifisiu ne'ebé sira kontribui ona.
Iha fatin hanesan, Prezidente INSS, Arlindo Pinto hatete, seguransa sosial proteje sidadaun nia moris liu husi subsídiu maternidade, paternidade, prestasaun sobrevivensia, inklui pensaun reforma.
Konsellu Administrasaun INSS no MSSI iha komprimisiu boot atu halo jestaun finanseira ida di'ak, transparansia, efikasia, no efisiensia liu husi Jestaun Fundu Rezerva Seguransa Sosiál.
Iha tinan hirak liu ba, INSS lansa kartaun seguransa sosiál ba sidadaun hotu-hotu ne'ebé durante ne'e kontribui liu husi taxa kontribuisaun traballadór 4% no empregadór 6%.
“Ita konsege muda mekanismu sistema pagamentu liu-liu ba ita-nia ferik-katuas, ne'ebé agora besik liu no halo pagamentu iha nível suku sira, ne'ebé simu fulan tolu-tolu. Ohin ita halo lansamentu sistema aplikasaun mobile APP, nu'udar feramenta dijitalizasaun ne'ebé sei tulun traballadór hotu-hotu," katak nia.
Tanba, tuir nia, aplikasaun ne'e hafasil traballadór hotu-hotu ne'ebé durante ne'e ladún hatene nia prosesu kontribuisaun.
"Seguransa Sosiál halo levantamentu desde kontribuisaun to'o iha tinan 2022, ita-nia kapitál iha miliaun $150, ne'ebé konsentra iha Banku Sentrál. Depois iha tinan 2023 ita halo levantamentu husi Fundu Rezerva Seguransa Sosiál mai iha konta propria Fundu Rezerva Seguransa Sosiál nian ne'ebé durante ita aplika iha merkadu finanseiru. Husi ita-nia kapitál miliaun $150, agora ne'e foin mak halo tinan ida ho balun, maibé iha aumenta millaun $254," nia relata,
Kapitál Fundu Rezerva Seguransa Sosiál fizikamente agora iha movimentu merkadu finanseiru hamutuk miliaun $233, ne'ebé durante ne'e aplika iha depozita prazu, ho nia provizaun reseita entre miliaun $10 to'o miliaun $12 kada tinan.
"Planu atu uza halo jestaun ativu ba ita-nia Fundu Rezerva Seguransa Sosiál hodi halo investimentu iha rai laran no esterior," katak nia.
