Prozetu rezolusaun ne’e aprezenta husi Ministru Ensinu Superiór, Siénsia no Kultura José Honório da Costa Jerónimo.
Tuir komunikandu ne’ebé Online INDEPENDENTE asesu katak, objetivu husi Rezolusaun Governu nian ida ne’e mak atu suspende kriasaun ba kursu foun baxarelatu, lisensiatura, pós-graduasaun, mestradu no doutoramentu nian iha área sira ne’ebé kobre barak ona iha oferta sira ne’ebé eziste iha instituisaun ensinu superiór nian.
Medida ne'e ho objetivu atu evita saturasaun (ne’ebé liu tiha limite) husi merkadu traballu ho profisionais iha área sira ne'ebé eziste ona númeru sufisiente husi formadu sira, hodi promove adekuasaun ida ne'ebé di'ak liu entre oferta edukasionál no nesesidades país nian.
“Área sira ne’ebé afeta ba suspensaun hanesan kursu Direitu ka Siénsia Direitu, Jestaun, Kontabilidade, Jestaun Finanseira, Jestaun Públika, Enjeñaria Sivíl, Enjeñaria Informátika, Konstrusaun Sivíl, Saúde Públika, Enfermajen, Parteira, Administrasaun Públika, Siénsia Polítika no Relasaun Internasionál,” haktuir Komunikadu ne’ebé Online INDEPENDENTE sita, kuarta (09/04).
Entretantu, Instituisaun ensinu superiór sira sei la bele loke kursu foun sira iha área sira ne'e to'o diploma legál foun sira kona ba planeamentu kurrikulár no regulamentu ba siklus estudu nian hetan aprovasaun.
Enkuantu, rezolusaun Governu ida ne’e mós determina hodi taka kedas kursus doutoramentu ne’ebé la hetan autorizasaun ne’ebé la’o hela iha rai-laran.
Medida ida ne'e sei tama iha vigór to'o konklui prosedimentu lejizlativu ne'ebé nesesáriu ba regulamentasaun kompleta ensinu superiór nian, ne’ebé permite halo avaliasaun hikas ba oferta kursu tuir nesesidade merkadu traballu no evolusaun setór edukativu nian.
