Projetu ne'e aprezenta husi Ministru Administrasaun Estatál, Tomás do Rosário Cabral.
“Projetu Dekretu Governu ida ne’e ho objetivu atu estabelese sistematikamente normas ba serimónia hasa’e no hatún Bandeira Nasionál, hodi garante ninia ezekusaun ho dignidade, rigór no uniformidade durante serimónia sira ne’ebé selebra iha loron Proklamasaun Independénsia Nasionál, iha loron 28 fulan-Novembru tinan 1975, no Restaurasaun Independénsia Nasionál, iha loron 20 fulan-Maiu tinan 2002,”dehan Komunikadu ne’ebé Online ne’e sita, kuarta ne’e (09/04).
Entretantu, dekretu ne’e kria Korpu Hasa’e Bandeira Nasionál (CIBN, sigla iha lian portugés), ne’ebé kompostu husi estudantes ensinu sekundáriu, feto no mane, ne’ebé sei responsavel ba ezekusaun téknika no simbólika husi aktu hirak-ne’e.
Define mós regras atu hala’o serimónia sira, estabelese kritériu ba selesaun membrus CIBN nian, determina insentivus finanseiru ba partisipante sira no espesifika protokolu ne’ebé atu tuir durante hasa’e no hatún Bandeira Nasionál.
