Diretor Relasaun externa no Komunikasaun Autoridade Protesaun Sivil (APC), Cesario da Silva Marques hatete, durante semana dahuluk fulan janeiru tinan 2024, uma kain walu (8) hetan estragus no ema ida lakon vida ne’ebé akontese iha munisípiu sira.
"Hahú iha loron 30 Dezembru 2023 to'o 08 janeiru 2024 durante semana ida ne'e iha akontese dezastre maka APC rejista uma hamutuk xefi familias 9 mak hetan estragus ho mate nain ida liu-liu iha munisipiu sira” dehan Diretór ba Jornalsita sira liuhusi konferiénsia Imprensa iha salaun APC, Kaicoli (08/01)
Iha akontesimentu sira mak hanesan, iha Munisipiu Bobonaro rai halai ida, Munisipiu Covalima akontese mota lori Santino Godinho to’o lakon vida, Munisípiu Ermera Ahi han uma ida, Munisipiu Likisa anin sobu uma ida, Munisipiu Lautem Ahi han uma ida, Regiao Administrativa Especial Oe-Cusse Ambeno (RAEOA) anin sobu uma rua no ahi han uma ida, iha Munisípiu Viqueque anin sobu uma rua, nune’e total vitima dezastre ne’ebé akontese estraga uma hamutuk sia (9) no ema na’in ida lakon vida.
“Hafoin akontese dezastre APC nasionál halo kedas intervensaun mak hanesan iha Munisípiu Bobonaro, Covalima, Ermera, Lautem no RAEOA halo ona assesmentu no verifikasaun no fó ona apoiu emerjensia ba vítima sira” hakotu nia.
