Timor-oan ne’e sai ona husi Hotel Fortuna iha Sabdu foin lalais, maibé hatudu fali moras hanesan sintomas COVID-19 bainhira hamutuk ona ho nia familia sira iha uma.
Diretór Servisu Saúde Munisipiu Ermera, Antonio de Deus Fatima informa, ohin kinta-feira dader familia ida iha postu Administrativu Hatolia Villa, Munisipiu Ermera, aprezenta mane ida ho inisial DA ba parte Saúde Hatolia tanba mosu ona sintomas ne’ebé atu hanesan ho moras COVID-19.
Inisiál DA ne’e fila husi estranjeiru no kumpre ona kuarentina loron 14 iha Hotel Fortuna, Hudi Laran Dili.
Hafoin livre husi kuerentina iha loron Sábdu 11 fulan-Abril, nia maun tula ho motor ba liu familia nia uma iha Ermera, Hatolia Villa, maibé ohin-kinta dader mosu fali sintomas inus metin, mear no isin manas.
Tuir Diretor Servisu Saúde Munisipiu Ermera ne’e hatete, timor-oan ne’e husi Ermera ne’ebé hetan sintomas atu hanesan ho sintomas Covid-19 nian maibé seidauk bele klarifika pozitivu ou negativu tanba ekipa jestaun krize nasional sei tuun foti hodi halo deste laboratoriun.
“Ami seidauk fó sai nia pozitivu ka negativu tanba agora dadaun ekipa epidemiolojia husi Ministériu Saúde ho ekipa husi laporatorium Dili agora dadauk iha fatin suspeitu, tanba ne’e rezultadu pozitivu ka negativu ne’e aban tuku 03 mak fó rezultadu,”dehan Diretór ne’e via telefone ba Diariu INDEPENDENTE,(16/04) .
