Prezidente Komisaun A, Deputadu Joaquim dos Santos hateten, iha tinan ida ba kotuk, komisaun simu Ema ho Defisiénsia hodi ko'alia kona-ba sira nia situasaun.

"Sira presiza hetan apoiu husi governu atu regula sira-nia ezisténsia atu hetan garantia ba sira-nia direitu hanesan sidadaun, ne'ebé konstituisiaun fó garantia," dehan nia, iha Parlamentu Nasionál, horisehik.

Governu tenke regula ida-ne'e no Parlamentu Nasionál hasai ona rezolusaun ida no aprova ona konvensaun internasionál hodi rekoñese sira-nia direitu espesial sira.

"Ministériu solidariedade ne'e ba konvensaun sira ne'ebé Parlamentu Nasionál ratifika ona, sira tenke kria kondisaun atu regulariza ba situasaun ne'e no fó atendimentu di'ak ba sira," tenik Joaquim.

Nia hateten, embora buat ne'e la'o hela, maibé ho ratifikasaun ba tratadu sira ne'e, iha forsa liu atu Governu liuhusi Ministériu Solidariedade Sosiál no Inkluzaun tau atensaun ba nia sidadaun timoroan sira.

Kona-ba atendimentu Ema ho Defisiénsia asesu ba edifisiu públiku nian ne'e kompeténsia governu nian.

"Ita kuandu iha ona lei, governu tenke kria kondisaun atu sira lee, hakerek, kondisaun ba sira atu hetan saúde di'ak, kondisaun ba sira atu halo pasajen ba fatin ida no buat sira ne'ebe sira-nia nesesidade loroloron," tenik nia.

Joaquim hatutan, ida-ne'e kabe ba kompeténsia governu nian tanba  iha ona regulamentu no lei sira hodi fó asistensia di'ak ba Ema ho Defisiénsia sira.

Molok ne'e, Parlamentu Nasionál (PN) liuhusi plenária aprova ona proposta rezolusaun númeru 16/V(4a)- ratifika adezaun konvensaun sobre Direitu Ema ho Defisiénsia no proposta rezolusaun númeru 17/V(4a)-ratifika protokolu Opsionál Konvensaun sobre direitu Ema ho Defisiénsia.