Ministru Komérsiu no Industria, Filipus Nino Pereira, hatete, kompañia importadór sira ne’ebé sei hetan subsidiu ba normaliza folin fós mak hanesan, kompañia Lisun Lda, Kreatif Lda, Alfa Dili no Perissos, Lda ho orsamentu hamutuk dolar amerikanu millaun $4 ba kompania refere.

“Dadaun ne’e, Governu iha ona dadus, no mós montante ba subsidiu ne’e. Hein de'it ita ofisializa ho Ministeriu Finansas hahú ona fa'an," dehan nia iha Palásiu Governu, kuarta ne’e (04/10).

Nia hatutan, subsidiu ne’ebé distribui ba kompañia importadór sira, atu fasilita populasaun bele kompras fós ho montante dolar amerikanu $12.

Entretantu, iha loron 27 fulan-Setembru Governu liu husi reuniaun Konsellu Ministrus (KM) aprova projetu Dekretu-Lei ne'ebé aprova medida intervensaun temporária ba estabilizasaun presu fós iha merkadu, liu husi atribuisaun subsidiu pekuniáriu ba empreza importador sira.

"Presu fós importadu, ne'ebé fa'an iha armazein empreza importadór sira nian no fa'an fila-fali ba konsumidór sira iha loja sira ne'ebé fa'an fós ho kuantidade uitoan, ne'ebé ema barak liu maka konsume, estabiliza ho valór $0,50 sentavus kada kg." dehan komunikandu ne'ebe Online INDEPENDENTE sita, Kuarta (27/09).

Benefisiárius husi medida ida ne'e, empreza sira ne'ebé fa'an ho kuantidade boot ka operador ekonomiku sira ne'ebe komprova, liuhusi kópia autentikada husi Autoridade

Aduaneira, katak sira importa no simu ona kuantidade fós ho karateristika ne'ebé define ona iha diploma ne'e, simu valor hamutuk dolar amerikanu $5 kada foos ho 25kg ne'ebé importa ka fa'an.

Enkuantu, diploma ida ne'e determina mós konstituisaun stock suplementár ida ba seguransa fós ho tonelada rihun 30, hodi rai iha armazein Sentru Lojistiku Nasional (SLN), ne'ebé destina ba intervensaun sosial iha situasaun emerjensia, liuliu, inundasaun, katástrofe naturál, motivu sanitáriu sira, solidariedade sosial no atu fornese ba empreza grosista sira hanesan, empreza sira ne'ebé fa'an ho kuantidade boot karik presiza.