Vise Ministru Asuntu Parlamentár, Aderito Hugo informa, folin mina ne’ebé sa’e ne’e tanba provoka husi folin kombustivel mundial. Tan ne’e governu sei halo estudu hodi haree ba nia tendensia.
"Kona-ba mina ninian, imi hotu hatene katak ne'e presu mundiál, ita-boot sira haree rasik. Ita sei haree hela tendensia. Governu rejista, akompaña tendensia ne'e atu ba to'o iha ne'ebé," dehan nia hafoin reuniaun Konsellu Ministru iha Palásiu Governu, Kuarta (04/10).
Iha prinsipiu, nia hatete, parte kuadru legal sira ba importasaun ne'e goza ona rejime taxa 2.5%.
"Mais tendensia ne'e sa'e nafatin, Governu sei akompaña par haree ninia impaktu ne'e husi saida. Mina ne'e ita hatene ona presu ne'e nein pais ida bele kontrola," katak nia.
Se nia tendensia sa'e, nia hatutan, Governu sei halo estudu par haree saida mak Governu bele halo iha situasaun ida ne'e.
"Bussines ida (kombustivel) ne’e emprezariu barak mak atrativu loos ba loke postu kombustivel ate demaziadu barak, entaun signifika katak importador sira barak interesadu halo importasaun ba mina, entaun ita akompaña impaktu ne'e to'o ne'ebé. Hanesan imi hotu hatene desde inisiu ita-nia estadu ne'e hamrik, ba mina ne'e ita nunka halo intervensaun ka nunka halo subsidiu," katak nia.
Kona-ba asaun greve husi kondutór mikrolete, Hugo dehan asaun ne’e sira-nia direitu.
“Maibé depois governu haree nafatin ho kuidadu, labele derepenti de'it mosu ho indikasaun ida ne'e sein halo avaliasaun, sein halo akompañamentu, estudus par haree tren ne'e saida.”
