Tuir planu, programa governu ne’e sei hahú aprezenta ba povu iha fim de semana ne’e. Referendu ba programa ne’e sei komesa husi Rejiaun Autónomu Oekusi.

“Ohin ita hahú prosesu foun ida. Mai ita prepara aan ba. Referendu ba Programa VII Governu”, dehan Xefe Governu, liu husi nia intervensaun iha Uma Fukun PN, horisehik.

Desizaun ne’e PM Alkatiri foti hafoin lee mosaun rejeisaun Programa VII Governu Konstitusionál ne’ebé bloku Aliansa Maioria Parlamentár (AMP) aprezenta. Baze husi mosaun ne’e la’ós kontra programa governu, maibé tanba ‘lakohi’ haree governu minoria atu ukun, maski la kontra Konstituisaun.

Ne’e duni, Governu ‘lakon konfiansa’ ba ema sira ne’ebé hanaran-aan reprezentante povu iha Uma Fukun PN. Tanba ne’e, hakarak lori diretamente ba povu hodi deside rasik programa ne'ebé atu lori moris di'ak ba sira.

AMP Hakarak Podér Ezekutivu

Entretantu, Prezidente Bankada CNRT, Arão Noe de Jesus hateten, opozisaun la’ós la gosta programa VII governu nian, maibé tan de’it labele garante sustentabilidade durante tinan lima ba oin.

Nia esplika, VII governu agora ne’e depende ona ba partidu opozisaun. Tanba ba oin sei hare mós Orsamentu Estadu nian agora se mai mak partidu opozisaun sira la fó votu afavór, entaun buat hotu labele la'o ona.

Tanba ne’e, mak mosu bloku AMP mosu atu asegura kuandu Programa VII Governu ne’e la liu, bele mosu kedas governu foun hodi labele garante eleisaun antesipada.