Deputadu sira husi bankada opozisaun bainhira atu sai husi Uma Fukun PN ba sira ida-idak nian uma tenke hetan seguransa husi polisia.

La’ós ne’e de’it, deputadu husi partidu opozisaun sira na’in hitu to’o ualu tenke sena malu iha bagajen karreta laran no hetan seguransa husi polisia bainhira atu fila ba uma, tanba ta'uk situasaun ne'ebé deskontroladu ona iha Uma Fukun.

Nune’e, Xefe Bankada husi partidu opozisaun tolu ne’e mós polisia oferese karreta ba sira no tula ida-idak ba nia uma.

Situasaun seguransa iha Uma Fukun Parlamentu Nasionál sai runguranga, tanba mosu reasaun husi deputadu bloku koligasaun no bloku AMP inklui mós simpatizante sira ne’ebé hakilar malu hafoin sesaun plenária.

Observasaun diáriu ne’e iha terrenu, antes tama diskusaun sesaun lokraik nian hodi aprezentasaun mosaun rejeisaun, Polisia Nasionál Timor-Leste (PNTL) husi Batallaun Orden Publika (BOP) tama ona ba sala plenária, hodi fó seguransa.

Ida ne’e akontese tanba haree tensaun polítika husi parte opozisaun no bloku koligasaun hahú sa'e makaas.

Nune'e, partisipante ne'ebé apoiu husi parte rua mós hatudu ona sinál la di'ak. Apoiante husi bloku koligasaun no opozisaun AMP komesa hakilar malu iha momentu ne’e.

Alende ne’e, apoiante bloku koligasaun mós kontinua hakilar no iha tensaun halo agresaun fízika hasoru apoiante opozisaun partidu tolu ne'e, maibé sira hotu halai tama ba Bankada CNRT. Nune’e polisia mós atua kedas seguransa hodi hakalma hikas situasaun.

Alende ne'e, parte husi deputadu koligasaun hanesan PD no FRETILIN atu fila ba ida-idak nia rezisdensia lao hanesan baibain, laiha polisia ida mak fo seguransa.

Maske akontese ema hakilar-malu no halai runguranga, maibe laiha sasan ruma mak hetan estragus. Nune’e, liu minutu 20 hanesan ne'e situsaun kontinua lao normal hikas.

Hafoin situasaun ne’e akontese, Ministru Defeza no Seguransa, Jose Sequeira ‘Somotxo’ tun direitamente hodi orienta polisia sira hodi fo seguransa ba deputadu opozisaun sira.

"Hau lakoi hau nia ema sira kanek" dehan Somotxo.

Nia hatutan, maske hanesan ema FRETILIN no politiku nain, maibe haree ba situasaun ne’e firme hanesan Ministeu Defeza no Seguransa hodi proteje.

Nia mos apela ba joven tomak iha teritoriu laran tomak atu hakmate iha ida idak nia fatin.

Nia hatutan, joven Timoroan tomak presiza hadomi malu kria unidade no pas, maibe kuandu halo krime ruma halo situasaun la hakmate mak sei haruka autoridade seguransa sira bele atua tuir lei.