Ho nune’e, Primeiru Ministru Taur Matan Ruak fó ona orientasaun ba Ministériu Interior atu oinsa anula free viza ba sidadaun Indonezia.

Vise Ministru Interior (MI), Antonio Armindo informa, nia parte simu orientasaun husi PM Taur atu halo rezolusaun ida hodi anula free visa ba sidadaun Indonezia ne’ebé tama mai Timor-Leste.

“Ita simu ona orientasaun husi PM Taur Matan Ruak atu halo rezolusaun ida atu anula tiha kedas rezolusaun ida uluk, atu hahú aplika fila fali rezolusaun foun, sidadaun indonezia tama mai Timor-Leste tenke selu vistu on arrival,” dehan Antonio ba jornalista sira iha edifisiu Ministru Interior, Villa Verde, Dili, Tersa (09/08).

Nia dehan, MI haruka ona rezolusaun foun ba gabinete PM no iha 10 Agostu, aban, bele ajenda ba diskusaun no aprovasaun iha reuniaun Konsellu Ministru.

“Ita halo rezoluzasaun foun ne’e tanba sidadaun Indonezia tama gratuita de’it, maibé ita haree laiha balansu ba ida ne’e, tanba ita ba Indonezia selu,” dehan nia.

Bainhira KM aprova, nia dehan, sei haruka ba parte migrasaun atu implimenta.

“Kuandu aprova ona ita laos haruka sira selu de’it visa $35, maibé sidadaun Indonezia sira mai hela iha  Timor-Leste loron 30 depois  estentaun mós tenke selu,” katak nia.

Entretantu, tuir rezolusaun númeru 25/2019, 18 Setembru, governu TL fó liberdade ba sidadaun Indonezia ho viza on arrival tama iha teritoriu Timor-Leste ho gratuita hahú iha 26 Setembru 2019.