Prezidente CNE, José Agostinho da Costa Belo hatete, bazeia ba Dekretu Lei númeru 6/2018, 14 marsu, kandidatu Prezidente Repúblika ne'ebé partisipa iha eleisaun iha direitu ba subsídiu bazeia ba votus ne’ebé sira hetan.
“Subvensaun ba kandidatu la hanesan situasaun ida uluk-uluk katak iha tiha subsídiu mak foin sira ba kampaña. Agora la'e, se kandidatu ida hetan votus hanesan ne'e, depois nia hetan direitu ida ne'e," dehan nia iha edifisiu CNE, Kolmera, Tersa (09/08).
Bazeia ba desizaun KM, nia hatutan, kandidatu ida sei simu $4 ba kada votus ne’ebé sira hetan iha eleisaun.
"Ami sura hotu kedas ona no hato'o ona ba Ministériu Finansas, agora finansas mak iha direitu atu foti osan iha ne'ebé, depois halo pagamentu bainhira, konta bankária ita fó hotu ona ne'ebé ha’u hanoin ita hein de'it," nia dehan.
José hatete, bainhira MF halo ona pagamentu sei informa fali mai CNE, maibé agora seidauk informa.
Tuir nia, pagamentu subvensaun ba kandidatu PR sira la hanesan ho subsidiu ba partidu polítiku nian.
“(Partidu Politiku) nia subsídiu ne'e klaru, sira millaun $6 kada tinan ba partidu polítiku ne'ebé asentu Parlamentár, entaun osan tama mai konta CNE nian depois CNE mak halo pagamentu, fasil liu.”
Tuir Dekretu Lei númeru 6/2018, 14 Marsu, kona-ba fixa valór subvensaun husi Estadu ba kandidatu Prezidénsia Repúblika ba kampaña eleitorál, iha artigu 2 kona-ba valór subvensaun, iha pontu 1 hatete ‘kada kandidatu prezensiál iha direitu atu simu subvensaun estadu ba kampaña eleitorál ho valór $4 ba kada votu ne’ebé hetan’.
Iha pontu 2 hatete; ‘kálkulu valór totál subvensaun ne’ebé estadu fó ba kada kandidatu prezensiál, bazeia ba númeru totál votu ne’ebé hetan, sei realiza ho baze ba akordaun judisiál válida ba votasaun dahuluk no proklama rezultadu eleitorál iha termu nú. 1, artigu 48, Lei nú. 7/2006, 28 Dezembru, bazeia ba redasaun Lei nú. 4/2017, 23 Fevereiru.
Entretantu, rezultadu eleisaun prezidensiál primeiru ronde, kandidatura José Ramos Horta hetan votus 303.477 (46,6%), Francisco Guterres ‘Lú Olo’ ho votus 144.282 (22,1%), Armanda Berta dos Santos ho votus 56.690 (8,7%), Tito da Costa Cristóvão ‘Lere Anan Timur’ ho votus 49.314 (7,6%), Mariano Assanami Lopes Sabino ho votus 47.334 (7,3%), Anacleto Bento ho votus 13.205 (2,0%).
Martinho Germano da Silva Gusmão ho votus 8.598 (1,3%), Hermes da Rosa Correia Barros ho votus 8.030 (1,2%), Maria Helena Lopes de Jesus Pires ho votus 5.430 (0,8%), Isabel da Costa Fereira ho votus 4.219 (0,6%), Felisberto Araújo Duarte ho votus 2.709 (0,4%).
Constâncio da Conçeicão Pinto ho votus 2.520 (0,4%), Rogério Tiago de Fátima Lobato ho votus 2.050 (0,3%), Virgílio da Silva Guterres ‘Lamukan’ ho votus 1.720 (0,3%), Antero Bendito da Silva ho votus 1.562 (0,2%), no Maria Ângela Freitas da Silva ho votus 711 (0,1%).
Bazeia ba votus refere, Horta sei simu subvensaun ho montante rihun $1.548.580, Francisco Guterres Lú Olo ho $969.760, Armanda Berta simu $169.260, Mariano Assanami Sabino simu $134.200, no Lere Anan Timur simu $126.560.
Anacleto Bento Perreira ho simu $38,808, Martinho da Silva Gusmão simu $25.492, Hermes da Rossa Correia Barros simu $21.024, Isabel da Costa Ferreira simu $12,076, no Maria Helena de Jesus Lopes Pires simu $11.800.
Felizberto Araújo Duarte sei simu $7.956, Constancio da Conceição Pinto simu $7.324, Rogério Tiago Lobato simu $6.332, Antero Benedito da Silva simu $4.480, Virgílio da Silva Guterres simu $4.352, no Maria Angela Freitas da Silva simu $2.132.
