Formasaun ne’e fornese husi Ministériu Saúde kona-ba prevensaun no kontrolu infesaun ba jestaun óbito relasiona ho Covid-19 ne’ebé seguru, nune’e bele iha preparasaun no koñesimentu.
Liuhusi komunikadu ne’ebé Online INDEPENDENTE asesu, kinta ohin (25/3) hatete, formasaun refere hala’o iha edifísiu Sentral MSSI, Kaikoli-Díli, enkuantu simulasaun hala’o iha ospitál Lahane no Metinaro, Loron Kinta-Feira (25/03/2021).
Iha oportunidade ne’e, Diretór Jeral MSSI, Rui Manuel G. Exposto hatete, formasaun ida ne’e ho objetivu atu haree preparasaun ekipa ida ne’ebé atu responsabiliza ba fúnebre karik ema mate ho Covid-19, tanba ne’e mak iha ekipa konjunta entre MSSI, Ministériu Saúde no Ministériu Estatal hodi nune’e ida-idak bele hatene ninia papel atu oinsá mak ekipa ne’e lalais atua hodi rezolve seremónia fúnebre ba ema ne’ebé mate ho Covid-19
“Papel MSSI nian mak prepara kareta no motorista ba Carro Funerario inklui Kaisoens, papel MAE nian mak prepara rai no Covero hodi hakoi mate, ba Ministériu Saúde nia papel mak wainhira pasiente ne’e moras tenke tau matan maibé kuandu mate ona entrega mai iha ekipa ida ne’e hodi rezolve”,dehan Diretór Jeral MSSI ne’e.
Iha fatin hanesan, Koordenadór Pilar 7, Dr. Nilton do Carmo da Silva esplika, formasaun ida ne’e oinsá atu bele fó koñesimentu ba maluk sira ne’ebé lori Carro Funerario nomós ba maluk sira iha semitériu atu bele hatene saida mak prevensaun no kontrolu infesaun ba jestaun óbito relasiona ho Covid-19 ne’ebé seguru.
Molok ne'e, Governu mos prepara ona kaixaun hamutuk 300, rai hakoi ema mate tanba Covid-19, no kareta funerariu. Preparasaun hirak ne'e nuudar maneiras antesipasaun hodi atende situasaun Covid-19 ne'e ho lalais.
Jornalista: Saturnina da Costa
Editor: José Sarito Amaral
