Implementasaun Serka Sanitária iha Dili laran kuaze semana tolu ona no komunidade barak mak aihan menus ona liuliu komunidade sira ne’ebé hetan hahan, hemu bazea ba sira nia servisu loroloron mak hanesan taxista, kondutor transporte publiku, nogosiante sira komesa halerik ona.
Tanba ne’e, presija medidas sira ne’ebé nesesariu atu bele proteje sidadaun sira, tanba regra balu afeta makaas tebes ba komunidade sira nia vida ekonomia no sosial, liuliu komunidade negosiante kiik sira ou negosiante ambulante sira iha merkadu no iha dalan ninin sira.
"Tanba ne’e Governu presija hadia medidas sira atu bele hatan komunidade nia ezijensia kona-ba serka sanitária nia implikasaun,"dehan Joao iha nia knar fatin Bairo Grilhos Dili ba Online Independente, kinta ohin.
Molok ne’e, negosiante kiik ne’ebé babain tula modo husi Likisa mai fa’an iha Dili, Rosa da Costa preokupa tebes ho situasaun serka sanitária ne’ebé halo impedimentu makaas ba sira nia atividade negosiu.
Ba online INDEPENDENTE hatete katak, regra iha ambito surtu Covid-19 la fó fatin ba sira atu tama Dili. Tanba ne’e afeita makas ba rendimentu hodi implika ba nesesidade vida moris lorloron nian.
Tanba ne’e, nia husu ba Governu atu bele buka maneiras oinsa atu bele fó espasu movimentasaun ba negosiante kiik sira bele kontinua hala’o sira nia atividade negosiu, ne’ebé kontinua kumpri nafatin regra serka sanitária.
Tuir nia katak, regra prevensaun surtu Covid-19 mós importante liu ba vida ema hotu nian, maibé labele impede mós atividade negosiu sira ne’ebé hamate nesesidade loroloron nian.
Entretantu Governu mos liuhusi Konsellu Ministru (KM), kuarta horsehik (24/3) aprova ona proposta lei ba medidas prinsipal neen hodi estabiliza ekonomia, iha ambitu surtu Covid-19.
“Alterasaun ne’e atu finansia konjuntu ida husi medida prinsipál neen ho intervensaun Governu nian ne’ebé prepara ona hanesan, apoiu ba empregu, moratória kréditu nian, izensaun propinas, akizisaun alimentu, apoiu ba profisionál liña oin sira no mós medida prevensaun no mitigasaun COVID-19,”dehan Ministru Prezidensia Konsellu Ministru, Fidelis Leite Magalhãenssalaun Ministeriu Finansas, Aitarak laran (24/03).
Jornalista: Camilio de Sousa
Editor: Jose Sarito Amaral
