“Nova Zelándia kontente atu anunsia aumentu númeru signifikativu Manaaki Nova Zelándia nia bolsa-estudu nível tersiáriu. Ba iha admisaun tolu tuir mai, ami sei aumentu númeru bolsa husi bolsa 12 ba 32 kada tinan. Ida-ne’e sei hahú iha tinan akadémiku tuir mai no ida-ne’e notísia di’ak tebes,” Embaixadora Helen Tunnah, hato’o asuntu ne’e hafoin enkontru ho Ministru Negósiu Estranjeiru no Kooperasaun (MNEK), Bendito dos Santos Freitas, iha sala enkontru MNEK Praia dos Coqueiros, Sesta (14/02).

Embaixadora Helen Tunnah hatutan, Ministru Negósiu Estranjeiru Nova Zelándia nian ne’ebé hala’o vizita ofisiál  mai Timor-Leste iha fulan juñu 2023 liu ba, deside ona atu haforsa amizade ne’ebé di’ak liután entre nasaun rua ne’e.

“Ida-ne’e nu’udar komitmentu forte ida husi Nova Zelándia ba dezenvolvimentu ekonómiku no umanu. Ida-ne’e mós reflete Nova Zelándia nia apoiu ba Timor-Leste, bainhira ita-boot sira buka atu adere ba ASEAN,” dehan Diplomata ne’e.

Tanba ne’e, liu husi programa bolsa-estudu refere, sei ajuda hametin liután prosperidade, seguransa no kresimentu sustentável, tanba Governu Nova Zelándia mós permite atu haburas ligasaun entre povu ho povu.

Entretantu, Governu Nova Zelándia oferese bolsa-estudu dahuluk ba Timor-Leste iha tinan 1990. No agora iha ona alumni hamutuk na’in 500 mak sai nu’udar benefisiáriu husi programa hotu-hotu Nova Zelándia nian.