“Ohin reuniaun konsellu ministru aprova nomeiasaun ba Florentino Mateus Soares Freitas ba kargu nudar Presidente Diretiva ba Autoridade Nasional Petroleu Minerais ANPM ba Mandatu Tinan Haat,”dehan Ministru Presidensial Konsellu Ministru (MPKM), Fidelis Leite Magalhaês iha Palasiu Governu, (29/07).
Fidelis dehan, ANPM aktual hanesan instituisaun reguladora ba setór sira no industria petroleu no rekursu minerais.
Iha fatin hanesan, Ministru Pertroleú Minerais (MPM), Vitór Conceição hatete, nomeiasaun ne’e tuir nesesidade no razoes politika governu nian.
"Sim ida nessesariu atu halo nomeasaun foun ba Prezidente ANPM tanba nesesidade maka haruka duni ita atu halo ida ne'e duni.Tanba nesesidade institusionál prontu atu bele iha mós rasoes politika, konfiansas politikas ho buat sira ne'e hotu,"tenik nia.
Alende ne’e, razaun Governu halo nomesaun ba iha Prezidente foun tanba Prezidente sesante ANPM Gualdino da Silva nia mandatu kleur ona. Tanba ne'e to'o ona tempu atu governu nomea ema seluk atu troka nia.
"Razaun kerdizer tinan sanulu resin rua, agora atu ba sanulu resin tolu, termus portantu to'o tempu ona para tenke fó fali oportunidade ba seluk i tanba nia mandatu hotu ona. Mandatu hotu ona ne'e maka tenke halo fali nomeasaun foun,"dehan Ministru Vitór.
Nia dehan, labele husik ema ida iha fatin ida ho tinan naruk, ne'e demokrasia la hanesan ne'e.
Tanba ne’e ho figura foun iha ANPM fiar katak Prezidente ANPM Florentino Mateus Soares Ferreira bele halo servisu ne'ebé di’ak.
“Tanba iha fiar, iha konfiansa maka nomea ne'e, se la konfia halo nusa maka ita halo fali nomeasaun foun.”dehan Ministru Vitor.
